amalinks wokungena

Breaking News

NSAA: Ukuvalwa Kwamankampani Kusiphazamisa Umsebenzi


NSSA Zimbabwe

Inhlanganiso yeNational Social Security Authority I NSSA ithi ukuvalwa kwamankampani lama fekitali eZimbabwe sokuyinto ebadanisayo ephazamisa indlela okumele isize ngayo uzulu elizweni.

Embikweni wayo wokuphela komnyaka iNSSA ithi kulamabhizimusi afika kwangamatshumi ayisikhombisa avalwe nyakenye izisebenzi ezifika kunkulungwane eziyitshiyagalolunye 9000 zalahlekelwa yimisebenzi okuyinto ebadanisayo kakhulu ngoba kuzaphazamisa indlela izisebenzi ezithola ngayo usekelo lwama pension ngesikhathi besiyaphumula lapho bengasela mandla okusebenza.

Ocubungula ngezezisebenzi enhlanganisweni yeZimbabwe Congress of Trade Unions umnumzana Elijah Mutemeri uthi udubo lokuvalwa kwamankampani lokugunyulwa kwezisebenzi lokhe kuyinto ekhathazayo sibili.

Uthi loludubo alukhangelani le NSSA kuphela kodwa lohulumende ngokwakhe, inhlanganiso zezisebenzi kunye labamabhizimusi. I NSSA ithi ibhekana njalo lobunzima bokubuthelela imali kubangelwa ngumumo wezomnotho elizweni okokuthi abasayitholi imali abayabe beyikhangelela ku budget yabo ngasikhathi sinye inani labafuna uncedo kiyo luqubekela phambili luqonga.

Leli nani laqonga lisuka kunkulungwane ezingamakhulu edlula ikhulu lamatshumi amahlanu- 152 952 ngomnyaka ka 2012 layafika kunkulungwane ezedlula ikhulu lamatshumi ayisithupha- 167 926 ngomnyaka ka 2013 kwabafuna usizo lwama pension, inani labafuna inhlaulo ye Workers Compensation liqonge lisuka kunkulungwane ezedlula kancane eziyisikhombisa- 7 257 ngo 2012 layotshaya kunkulungwane ezedlula kancane eziyisitshiyagalolunye- 9 313 nyakenye.

Ithi noma kunjalo ikhangelela ukuba uhulumende ethuthukise ezomnotho phansi kwe ZIMASSET njalo ikhangelela ukuba yengezelele amalunga phansi kwesibopho sikahulumende sokufuna ukuba abazisebenzayo babe ngamalunga e NSSA.

Umnumzana Mutemeri uthi Ibhizimusi elikhulu elifana le NSSA alimelanga limelele i ZIMASSET kuphela. Uthi abasebenza bezimele kuInformal Sector babhekana lenkinga ezithile okungasoke kuphathise ukuba behlauliswe njalo:

Ibandla le Zanup PF langena kukhetho nyakenye lithembisa ukuvuselela ezomnotho welizwe ngaphansi kwe Zimbabwe Agenda for Economic Trasformation ZIMASSET kugoqela amafekitali, lithembisa njalo lokuvula imisebenzi edlula kancane kuzigidi ezimbili.

Abacubungula ngezomnotho bathi lokhu kunzima ukuba kwenzakale ngoba kuzadinga imali enengi kunye lokuthembakala kukahulumende.

XS
SM
MD
LG