Amalunga enhlanganiso yentathelizindaba zemidlalo eyeSport Journalists Association emhlubulweni wangezansi kwelizwe, iSouthern Region, aphezu kwemizamo yokuphathisa umqeqetshi womdlalo wenqindi uPhilip “Striker” Ndlovu, yena ophethwe ngumkhuhlane wemvukuzane.
Ekhuluma ngesikhathi bevakatshele uStriker lapho ahlala khona elokitshini leMakokoba, umgcinisihlalo wenhlanganiso yeSpoja (SR) uLovemore Dube uthe bakubone kufanele ukuba bezame ukuphathisana laye ngoba kungumuntu abasebenzelane laye kakhulu okweminyaka eminengi.
“Kumele ayehlinzwa afakwe icatheter emzimbeni wakhe ukuze kululazwe ubuhlungu abuzwayo. Namhla sihlanganise losuku lwakhe lokuzalwa njengoba esefikise iminyaka engamatshumi ayisithupha lesithupha,” kutsho uDube.
“Simnike lamadola aseMelika alikhulu lamatshumi amathathu esesiwahlanganisile kodwa umkhankaso uqhubekela phambili sicela bantu bakithi siphathise umqeqetshi asile abuyele enkundleni.”
UStriker ubanjwe umkhuhlane wemvukuzane yohlobo lwe-prostate cancer nyakenye njalo ngaleso sikhathi ubedinga inkulungwane ezintathu ezamadola aseMelika ukuze ayehlinzwa kodwa leyomali akasayitholanga wacina esengolele phansi.
Loba kunjalo uthi yena ulalo ithemba elokuba uzasila abuyele ayeqeqetsha abadlali bomdlalo wenqindi.
“Ngileqiniso lokuthi singanqoba linto esikhangelane layo ngizabuyela mina ngiye ekhoneni labafana. Hatshi sibe seZimbabwe kuphela kodwa sizachaphela ngaphandle njalo abanye benu lina ntathelizindaba bazangiphelekezela, sizachapha sisonke, ngiyabonga,” kutsho uNdlovu.
Abanye abadlali abalodumo abaqeqetshwe nguStriker babalisa uThamsanqa Dube yena oke waba yingqungquthela kusigaba seWorld Boxing Association Pan-Africa Heavyweight, uMordecai Ngwenya owayeyintshantshu kusigaba seLightweight lakusigaba seMiddleweight okweminyaka eminengi eZimbabwe kanye loElvis “Bulawayo Bomber” Moyo owake waba yingqungquthela kusigaba seWorld Boxing Federation kuzwekazi laseAfrica.
