amalinks wokungena

Breaking News

Intathelizindaba Elodumo, uJanet Munyaka Obhube NgoMgqibelo Ungcatshwa eHarare


Emngcwabeni yentathelizindaba uJanet Munyaka
Emngcwabeni yentathelizindaba uJanet Munyaka

Intathelizindaba elodumo ebisebenzela inkampani yeZimbabwe Broadcasting Corporation - ZBC uJanet Munyaka, ungcwatshwe emathuneni aweGlenforest ngemva kokubulawa ngumkhuhlane weCOVID-19 ngoMgqibelo ekuseni, kulokukhalaza kwabamankampani ezindaba ukuba aqakathekise ukulondolozwa kwezisebenzi zabo ngesikhathi ziqhuba umsebenzi.

Lokhu kuza ngesikhathi inani labatholakala belalomkhuhlane njalo bengabazange bethekelela kwamanye amazwe liqhubeka liqonga elizweni.

Intathelizindaba uJanet Munyaka
Intathelizindaba uJanet Munyaka

U-Munyaka uba yintathelizindaba yesibili ukukhulelwa yilomkhuhlane ngemva kokubhubha kwenye njalo uZororo Makamba ngoMbimbitho lonyaka.

Umphathintambo wezokwethulwa kwemibiko uNkosikazi Monica Mutsvangwa obe khona emngcwabeni kaJanet Munyaka uchaze umuyi njengomuntu owayezinikela emsebenzi wakhe.

“Ngilokudana okukhulu. uJanet ubesemsebenzini emavikini ambalwa nje ngaphambilini kokugula kwakhe, anduba asiwe esibhedlela. Wayewuthanda umsebenzi wakhe. Bangaki phakathi kwethu abayithandayo imisebenzi yabo?. Bangaki abazinikeleyo kulokho abakwenzayo kakhulu nxa ungumunu osebenzela umsakazo wabantu, ukufundisa uzulu lokumthokozisa?”

Abenhlanganiso ezilwela ilungelo lentathelizindaba ezigoqela eyezisacathulayo yeYoung Journalists Association - Zimbabwe baveze ukukhathazeka ngokubhubha kukaJanet bekhuthaza uhulumende labaqatshi ukuba bathathe amanyathelo okuzilondoloza njengakuphathwa kwabakuhlangothi oluqakathekileyo lwamaEssential workers olugoqela abongi.

Isikhulumeli seYOJA, uLeopold Munhende uncome uJanet esithi yena labanye bakhe abasacathulayo, bafunde okunengi kundlela ayeqhuba ngayo umsebenzi.

“Sithi langalezo kuntathelizindaba zonke eZimbabwe ngokulahlekelwa ngu Janet Munyaka. U Janet Munyaka bekungusisi obesebenza lathi singabesincane, ngendlela eyokuthi ubesifundisa, esixwayisa lapho okufuna khona ukuxwayiswa.”

Kodwa uMunhende uthi bakhathazekile njengenhlanganiso ngokusilela kwendlela zokuvikelwa kwentathelizindaba emsebenzini.

“Sibona iCOVID-19 le isibulala intathelizindaba eyesibili. Okutsho ukuthi thina njengentathelizindaba kufuze lathi sinakekelwe. Besinike ama face masks, leyinye iProtective Equipment eyenza sisebenze singekho engozini.”

U-Nkosazana Bongiwe Dube wenhlanganiso yeCommunity Youth Development Trust, eGwanda uthi njengenhlanganiso bakhathazekile ngendlela uhulumende aphatha ngayo udaba lwe COVID-19.

“Okucinayo kwenza sibukeke angani asizimiselanga njengelizwe ekulwisaneni le COVID-19. Kusukela ngo March kuze kube khathesi, okokuthi sokule 9months, umkhuhlane lo waqala kodwa indlela yama Isolation Centres ethu, ilokhe ifanana. Sengikhangelela njengase Gwanda. I Gwanda Provincial Hospital, ayikwanisi ukuthi i admithe ama patients abe manengi awe COVID-19. Kuyikuthi ngabe kudala kwalungiswa ezinye izindawo ngoba after 9months sikhangelele ukuthi ngabe iGovernment yethu isike yalungisa amanye amaIsolation Centres ukuthi nxa umkhuhlane lowo ugcwala, umemetheka, abantu bathole izindawo zokuyavalelwa khona.”

Kunje uMaDube uthi lokhe isilela impahla yokusebenzisa ekuzivikeleni kuleligciwane kulabo abasebenzisana lozulu sikhathi sonke ama Essential Workers.

“Ungakhangela amapholisa ukhangele oGuard benkambeni, bayabe behamba bengelawo ama PPE’s. Sesikhangelele izigqoko zona lezo kumele bezigqoke. Sikhangele ama mask, sikhangele ama sanitisers, bayabe bengelazo zonke lezi izinto. Laloba ufika enkambeni, ziyashota becine sebeesenza lezi ezokuziphekela ikanti bekumele ukuthi ngabe kufika lesi sikhathi, bayazinikwa yiGovernment. Yikho okucina kubukeka ingani iGovernment yethu iyehluleka, ilokhe ingazimiselanga ekulwisaneni le COVID-19. Sesikhangele nge state eyokuthi ama Governement hospitals lokhe enjani till now, 9months later lokhe enjalo. Lokhe kungela kuntshintsha okubonisa ukuthi hayi, ilizwe lizimisele ekubeni lilwe le COVID-19.”

Ngakwelakhe icele uhulumende uthi ukhathazekile ngendlela uzulu aseyekethisa ngayo ukuzilondoloza kulomkhuhlane, engasazandeli iziqondiso ezabekwa nguhulumende zokuzivikela ukuthelelanwa lula kweCOVID 19 azifakayo laye elandela ezafakwa ngabe World Health Organisations - WHO.

UJanet utshiye umkakhe uJackson labantwana abane.

Sebefika phose inkulungwane ezilitshumi lanye - 10 718 asebetholakale bele COVID - 19 selokhu waqhamukayo kuleli ngenyanga kaMbimbitho, kwabhubha abafika phose amakhulu amathathu - 291. Izigaba zeMaNdebeleni yizo ezikhokhelayo kunani labatholakala belalomkhuhlane zilandelwa lidolobho leHarare. Inengi lalaba bantu kungabangazange bavakatshele kwamanye amazwe.

XS
SM
MD
LG