amalinks wokungena

Breaking News

Intathelizindaba Zikhala Ngokungavikelwa Ngabaqatshi Ekuthelelweni iCovid-19


Umsakazo weZBC wethule umbiko othi, ulentathelizindaba ezingamatshumi amathathu esezitholakale zilegciwane le Covid `19.

Lokhu sokwenze intathelizindaba elizweni lonke jikelele ziveze ukukhathazeka ngokungavikeleki emkhuhlaneni lo, lapho zisebenza.

I-Covid-19 isiphambanise indlela abantu abasebenza ngayo, okugoqela lentathelizindaba zeZimbabwe. Inhlanganiso ezimela intathelizindaba zithi abaqhatshi kumele baqinise indlela zokuzivikela ukuze kukhanye ukuba bayaqakathekisa ukulondoloza impilo zezisebenzi.

UMnu Nigel Nyamutumbu owenhlanganiso ye Media Alliance of Zimbabwe (MAZ) uthi kumele abaqhatsha intathelizindaba bazithengele impahla yokuzivikela.

“Inhlanganiso eziqhatsha intathelizindaba kumele zibone ukuba onozindaba bavikelekile. Kumele sibone ukuba intathelizindaba zile zembatho ezivunyelwayo okumele baziqgoke ukuvikela kulumkhuhlane”

Lokhu kugcizelelwe ngu Mnu Admire Masuku umbalisi wezifundo zentathelizindaba ekolitshini ele Harare Polytechnic.

“Nxa sibheka inhlelo ezenziwayo ezokuba abantu abesebenzela endaweni ezile Covid kukhulunywa ngabomongikazi, akula abantu abakhangela ukuba intathelizindaba zivikelekile”

Isikhulumeli senhlanganiso ye Young Journalists Association (YOJA) uMnu Leopold Munhende uthe njengenhlanganiso basebenza gadalala ukubona ukuba intathelizindaba ziyathola indlela zokuzivikela.

“Ama newsroom kabalamali yokuthenga ama mask, intathelizindaba zicina sezisengozini. Abanye bayazama ngokuthi intalezindaba ezinye sezivunyelwa ukusebenza endlini. Uhulumende kumele avume ukuba iCovid isikhona ame ukubiza abantu emhlanganweni”

Kodwa eyinye intathelizindaba ezimeleyo uKudzai Gerede uthi udubo yikuthi abaqhatshi kabalamali yokubhadala ukuba intathelizindaba zihlolwe.

“Kulodubo olokhu ngoba ukuthi ba teste ama journalist kuyinkinga enkulu kakhulu. Kabalayo imali yokuba benike intathelizindaba ukuba bayehlola lumkhuhlane”

Umuntu wakuqala obulewe ngomkhuhlane we Covid-19 eZimbabwe, yintathelizindaba uZororo Makamba, kulenkuthazo yokuba intathelizindaba zivikeleke.

Unobhala kugatsha lokwethulwa kwemibiko uMnu Nick Mangwana ngeviki edluleyo wethule umbiko othi uhulumende usezakupha intathelizindaba imibiko esebenzisa indlela zakulezinsuku ukuze zingabuthani ndawonye zimenyezelene zingalandeli iziqondiso zeSocial Distancing ukuvimba ukuthelelana lula leli gcikwane.

Udaba lwezikhalazo zenthathelizindaba zokungavikeleki kuCovid 19 siluphiwa nguMlondolozi Ndlovu
please wait

No media source currently available

0:00 0:04:04 0:00

Facebook Forum

XS
SM
MD
LG