amalinks wokungena

Breaking News

Intathelizindaba Zivinjwa Ukuthapha Izindaba Eziphathelane loUnited Nations Special Rapporteur, Alena Douhan


Intathelizindaba ziyavinjwa ukukhulumisani loba ukuthatha imifanekiso yomthunywa oqakathekileyo wenhlanganiso yomanyano wamazwe womhlaba, u-United Nations Special Rapporteur, Alena Douhan, osekwethekeleleni eZimbabwe ukuzazibonela umonakalo obikwa ngabe Zanu PF ukuthi udalwe yizijeziso zenotho ezafakelwa ilizwe ngamazwe angentshonalanga.

Unkosikazi Alena Douhan ofike eZimbabwe ngeSonto, ungene imihlangano embalwa leziphathamandla zikahulumende okugoqela uMongameli Emmerson Mnangagwa, ngoMvulo, kodwa intathelizindaba kazitholiswanga ithuba lokuxoxisana laye njengenhlalayenza, zaliswa khona ukuthatha imifanekiso.

Intathelizindaba eziye edale lephalamende ngesikhathi uNkosikazi Douhan eyebonana lomlawuli wedale lephalamende, umnumzana Jacob Mudenda zixotshiwe yiziphathamandla zabogatsha lobudlelwane lokuthengiselana lamanye amazwe.

U-Collin Ncube yintathelizindaba yase Harare, esebenza izimele. Yenake uthi ukuvinjwa kwabo njengabezindaba yikwephula amalungelo oluntu.

"Kunzima bakithi ukuthathela izindaba useZimbabwe ngoba khathesi sesikhangele u-UN Rapporteur, ufikile eZimbabwe now njengeMedia asisakwanisi ukuthi sixoxisane laye kumbe sithathe imifanekiso laye kumbe simuzwe ukuthi ulandeni njalo ufisa ukuzokwenzani lapha, sazise izizalwane zeZimbabwe, kuba nzima kakhulu."

Ulandisa ngokuqakatheka komsebenzi wabathapha izindaba uNcube ukuze uzulu azi okwenzakalayo.

"Ukuthi i-Media layo ithi play a role, yokwazisa abahlali beZimbabwe ukuthi silesethekeli esinje esilande lokhu lalokhu, sithi sona sesihlangane labantu abanje, abanje, ukwenzela ukuthi kungabi yinto kahulumende kodwa kube yinto yezizalwane zeZimbabwe, ngoba umuntu lo kalandanga uhulumende, ulande ukuzozwisisa ngendaba zamaSanctions eZimbabwe."

Kodwa isikhulumeli sikaMnangagwa, umnumzana George Charamba, uthi uNkosikazi Douhan nguye owacela uhulumende mhla efikayo ukuba bamvikele kwabezindaba.

“Uthi yena akafuni ukukhulumisana lentathelizindaba engakaqedi umsebenzi wakhe wokudingisiso kulokho angakho. Kuyezwakala lokho, lifuna ukuthi athini yena elethwe kweleZimbabwe ngovivi nje. Uhlangane lomongameli izolo, akakabi lolwazi olwaneleyo ngohlelo lwakhe, manje lithi uyabe esekhuluma esithini?. "

Bakhona abathi kukhona okutshaya amanzi abanjengomqondisi wenhlanganiso ye Zimbabwe Devine Destiny u-Bishop Ancelimo Magaya.

"Yikuba mbaxambili kukahulumende ke lokho njalo akumelanga kuvunyelwe. Asikudingi thina ukube lokhe sibuswa ngesandla esiqinileyo, ukube lokhe sitshelwa ukuthi senzeni."

Intathelizindaba zithi zimangaliswe yilokhu okwenzakalayo njengoba zihlezi zisazi ukuba ziyavunyelwa ukuthatha imifanekiso lalapho isethekeleli siyalile ukukhulumisana lazo kodwa akunjalo kulesi esibuye ngaphansi kwe UN ukuzahlola isimo kwezokubekelwa izijeziso zomnotho.

Facebook Forum

XS
SM
MD
LG