Intathelizindaba sezivumelane indlela ezizaloba ngayo amanye amabala ngombhuqazwe weGukurahundi alakho ukwamukelwa nguzulu hatshi azaxabanisa abantu. Bazasebenzisa amagama la ngesikhathi besethula imibiko yokwenzakala eMatabeleland phansi kohlelo oluqhutshwa zinduna olokuhlolisisa umbhuqazwe weGukurahundi.
Intathelizindaba ziphume lamabala la namuhla koBulawayo emhlanganweni eziwenze lekhomishini eyeZimbabwe Media Commission. Kukhangelelwe ukuba kuzaqhutshwa umhlangano ofanayo eHarare ngodaba lolu.
UKhomishina Aleck Ncube, owe Zimbabwe Media Commission, uthi kuhle ukuba intathelizindaba ziyazihlelela zona ngokwazo indlela zokuziphatha ngazo ngesikhathi zisebenza kulolu hlelo.
"Kuhle intathelizindaba zezizathola ithuba lokuloba indaba bekhululekile ngesikhathi seGukurahundi outreach oluzakhokhelwa zinkokheli zomdabu."
Umabhalane weZimbabwe Media Commission uMnu. Godwin Phiri ubike ukuba umhlangano olandelayo wokulolonga ugwalo lokusebenza kwentathelizindaba uzakwenzelwa eHarare. Ngemva kwawo bekusekuhlelwake umhlangano wemfundiso ngombhuqazwe andubana ziphiwe imvumo yokuya emihlanganweni yokuhlolisiswe umbhuqazwe lo zinduna.
"Siqhube kuhle umhlangano leNtathelizindaba koBulawayo sikhangelele ukuqhuba umhlangano ofanayo eHarare njalo sisebenza lenkokheli zomdabu sizakuyakubo sesiphume logwalo lwethu oluhlolwe zintatheli ezweni zavumelana."
Ongene umhlangano lo uMnu. Mandla Tshuma oyintathelizindaba uthi uhlelo luhlelekile.
"Lapho ebesingavumelani khona lokuohume lekhomithi sikulungisile savumelana ukuba kumenjani njalo sesikhangelele ukuthi siyefunda singene emihlanganweni ezakhokhelwa zi duna."
UNkosazana Rumbidzai Mhlanga oyintathelizindaba uthi kuqakatyekile ukuloba ngimbhuqazwe ngendlela ehloniphekayo.
"Kuhle sesiphume lendlela yokusebenza ngakho ngikhuthaza abanye bami ukuna balandele indlela eziqondileyo zokuloba ngodaba lweGukurahundi ngoba kulithuba lakuqala elisethethweni elisivumela ukubhala sikhululekile."
Eyinye njalo intathelizindaba engene umhlangano osebenzela eGwanda uMnu. Mvelo Zondo uthi ukulotshwa kuhle kombhuqazwe weGukurahundi kungengeza amathuba okupholisa amanxeba.
"Abantu bazathobeka lobanje kungeke kufike lapho abakhangelele khona ngoba kulithuba elihle esilutholileyo." lkomidi yentathelizindaba isebenza lomabhalane wogatsha olubona ngokwethulwa kwemibiko, uMnu, Nick Mangwana, leZimbabwe Media Commission iphume lengwalo ezintathu ezizabakhokhela ekulobeni udaba lombhuqazwe ezibalisa abathi yiThe Gukurahundi Outreach Reporting Guide, iGukurahundi Code of Conduct Pledge 2024 leGukurahundi Outreach Media Coverage Consent Form. Intathelizindaba ebezisemhlanganweni lo namuhla zivumelene ukuba ziqondile iiziqondiso ezihlelwe yikomidi, ebunjwa ngamalunga agoqela uZenzele Ndebele, Nduduzo Tshuma, Monica Churu.
Umbhuqazwe weGukurahundi wabulalisa abantu abedlula inkulungwane ezingamatshumi amabili, 20,000 eNkabazwe leMatabelelend phakathi komnyaka ka1983 lo1987uhulumende esebenzisa iviyo lebutho ele5th Brigade.
Forum