Uzulu wakoBulawayo uveza imibono ehlukeneyo ngombiko owethulwe luhlangothi lweZimbabwe National Statistics Agency-Zimstat othi intengo yempahla ezibambekayo lezingababekiyo iqhubeka ikhuphuka ezweni kukanti iholo labantu lokhe limi ndawonye osekudale ukukhathazeka okukhulu ebantwini.
Abohlangothi lweZimstat batshele umhlangano lentathelizinda NgoMvulo, ukuba intengo yempahla ezweni iqanse ngesilinganiso sokuyisikhombisa ekhulwini kukanti iholo labantu lona alikhuphulwanga.
UMqondisi weNational Consumer Association, uMnu Effie Ncube uthi intengo yempahla eqakathekileyo kazulu yiyo ekhuphuke ngamandla.
"Intengo yezinto iyakhwela njalo nje, sikhulumanje kukhwelile izinto abaphila ngazo abazidinga njalo nje kusukela ukudla lokokuwatsha, kuveza ukuba isismo somnotho siyadilika abakuphetheyo kuyaphela, abantu abalamsebenzi, abanye iholo alikhuphukanga kuveza obala ukuba abantu ababuswa kahle."
Olwela amalungelo oluntu uNkosikazi Cora Ndebele uthi konele ukuba uhulumende afake umthetho uStatutory Instrument (SI) 127 kwahle kwawonakala.
"Sekunzima bakithi ezweni yonke into iyakhwela ezweni, uhulumende wonele ukuba athi abezitole balinganise intengo lesisindo semali yedola lemelika emabhanga izinto zaqala ukukhwela amarates, impahla amagrocery kukhwelile, ngapha ledola lemelika akuhambelani, abantu bahola imali yakuleli akuhambelani lomkhuhlane weCovid lawo uhlasele akuphileki ngapha lezinto zikhwela nsukuzonke."
Isakhamuzi sakoBulawayo ongomunye wabaphila ngokuzisebenza, uNkosikazi Debra Mukasa uthi ukuqonga kwentengo sokubadalele ubunzima.
"Intengo yempahla ezweni iqansa mahlayana okudala ukuba uzulu aphile nzima umathenga lomathengisa. Lokhe kubelomthetho omutsha wenze kwabanzima ngamandla ezweni. Inengi lihola idola leZimbabwe kuthi impahla sezithengiswa ngedola leMelika akuhambelani njalo kukhama abalungisa lezimpahla ngoba basuka baqansise intengo yempahla zabo ukuze labo babelenzuzo."
Inengi labantu likhala ngokukhuphuka kwentengo yempahla ezitolo bethi akusahambelani leholo abalitholayo uhulumende sekumele angenele okuyinto evunywe ngabe Zimstat ukuba intengo yempahla iyakhuphuka kukanti iholo lokhe lingakhuphuki.
