Ukusilela kwamatsiyane koBulawayo lokhe kuqhubekela phambili kulandela ukuqhamuka komkhuhlane wenkukhu ekuqaleni kukaNcwabakazi lonyaka.
Lokhu sokubangele ukusilela kwenkukhu ezithengiswayo lokuqonga kwentengo yazo ezitolo.
Abathengisa amatsiyane koBulawayo abenkampani yeHiGrow bathi lokhe bethengisa amatsiyane kodwa abenelisi ukuthi wonke umuntu ofuye inkukhu athole amatsiyane ngenxa yokuthi sebesandelwa. Lokhu kwandelwa kubangelwa yikuthi ikampani enkulu eye Irvines yahlaselwa ngumkhuhlane wenkukhu owe H5N8.
UMnu. Clarence Mutangara, oyisikhulumi seHigrow koBulawayo, uthe inkampani yakhe iyazama ngazo zonke indlela ukuthengisela abantu amatsiyane ngemfanelo kodwa isisandelwa ngemva kokuqhamuka komkhuhlane lo.
Ophila ngokuthengisa inkukhu, uNkosikazi Sazini Dube, uthe lokhu sokubabulalele ibhizimusi ngoba ukusilela kwamatsiyane sokusitsho ukuthi ikhefu leKhisimusi lizafika bengelazo inkukhu zokuthengisa.
Omunye njalo othengisa inkukhu, uMnu. Nigel Moyo, ugcizelele esithi sebelokhe babhalisa ukuthi bathole inkukhu lokhe bengazitholi njalo lentengo yamatsiyane seyakwezwa okwesabekayo.
Uphenyo olwenziwe yiStudio 7 luveze ukuthi intengo yenyama yenkukhu isiqonge kakhulu ezitolo. Iphakethe elilesisindo sama kilograms amabili -2kg - ebelingamadola ayisithupha ($6) selingamadola alitshumi lanye ($11).
UNkosikazi Nomqhele Bhebhe, obethenga esitolo, uthe intengo le ikhuphuke kakhulu.
Ezinye indawo ezithengisa amatsiyane koBulawayo ezivakatshelwe yiStudio 7 lazo azila matsiyane kodwa zalile ukuphendula imibuzo besithi bona labo bathenga eHigrow ngakho imbuzo ingaphendulwa ngcono yiHigrow.
IZimbabwe ayenelisi ukuthenga amatsiyane lamaqanda kweleSouth Africa ngenxa yokuthi iSouthAfrica layo yamisa ukuthengisa ngemva kokuqhamuka komkhuhlane lo. Kumaviki ambalwa adluleyo inkukhu ezingamathani alitshumi lambili (12tonnes) zalahlwa eHarare ngenxa yokuthi zazingalungelanga ukudliwa nguzulu ngenxa yomkhuhlane.