Amafutha ezimota aqhubeka esilela e Zimbabwe njalo abathengisa lawo amafutha basola indlela yokuhlaulela kamakhalekhukhwini eye eco-cash bethi yiyo ephuzayo ukukhipha imali ukuze benelise ukunikezwa imali yakwamanye amazwe yokuwoda lawo mafutha.
Indwendwe zezimota ziya zisanda emagarajini wonke ko Bulawayo ngenxa yokusilela kwamafutha.
Kuliviki amafutha asilelayo yi petulu njalo kwezinye indawo koBulawayo imitshova ibisikweziwe imbandalo yokugada isuka ku50 cents isiya kudola.
Otshayela imitshova umnumzana Sipho Masina uthi ipetrol ayikho njalo kuviki ephelileyo kuke kwasilela idizili.
“Okwenzakalayo khathesi yikuthi ifuel iyasilela njalo kuviki ephelileyo bekusilela idizili. Abamagaraji nxa sibabuza bathi imali ziyaphuza ukukhanya okucina kusenza ukuthi sithole imali eReserve bank late,” kutsho uMasina.
Umnumzana Blondi Ncube uthi imtshova ayisoze ikhwezwe nje mahlayana ngenxa yokuthi intengo ye phethulo ayikhwezwanga.
Kutsho uNcube: “UMtshova awusoze uphuphela nje ngoba intengo ayikhwelanga.
Umnumzana Thulani Mlauzi uthi ukusweleka kwamafutha sekusenza ukuthi bacabange ukuthi uhulumende kaMugabe ubengcono.
“Indaba yefuele isithwalise nzima sekungani igvt ebikhona ibingcono ngoba loba izinto bezidula bezitholakala. Khathesi isinkwa sikhwelile ifuel isicatsha
Ngokubona kwami ukusilela kwefuel kuzakwenza ukuthi abantu bagcine ifuel then laba abathengisayo abezitolo bazadinga ukukhweza intengo yezinto zabo,” kutsho uMlauzi.
Isisindo sedollar leMelika sesiqanse okumangalisayo okokuthi elilodwa selithengiswa ngamadola amabili awe Bond Note nxa umuntu efuna ukufakelwa imali ebhanga.
Lokhu kwenza ukuthi ilizwe lingenelisi ukuthenga izinto ezinengi ezidingakalayo kwamanye amazwe, Njalo nxa kulokhe kuqhubeka kunje intengo yempahla layo izaqansa.