Ikhomithi yedale lephalamende eMelika, eleCongress, ephenya udlame olwabangelwa ngabasekeli bakaMnu Donald Trump kulelidale mhlaka 6 ngoZibandlela iqale umsebenzi ngoLwesibili.
Amalunga alikhomithi abalisa awebandla lamaDemocrats ayisikhombisa kanye lawebandla lamaRepublicans amabili.
Amapholisa amane ayeseCongress ngosuku lodlakela lolu atshele ikhomithi le ukuthi kumele iphume leqiniso njalo lichaywe ukuze isehlakalo esifanayo singaze saphinda senzeka.
Abantu laba batshotshozelwa nguMnu Trump ukuthi bayevimba ukwamukelwa kokukhethwa kukaMnu Joe Biden njengoMongameli weMelika omutsha.
Udlame lolu lwabangela ukufa kwabantu bayisithupha njalo kwabotshwa abedlula amakhulu amahlanu asebebhekane lamacala ezinkantolo ezitshiyeneyo.
Ocubungula ezombusazwe uDr Brilliant Mhlanga utshele iStudio 7 ukuthi umsebenzi oqhutshwa yikhomithi le ubalulekile kakhulu.