amalinks wokungena

Breaking News

Iqembu leWarriors Lilubhekise Kwele Cameroon


Zimbabwe Warriors at a training session in Harare.

Iqembu elimela ilizwe emdlalweni wenguqu, elama Warriors lisukume ngoLwesibili, emini lisiyaphatheka kumncintiswano we African Nations Championship, kumbe iCHAN ngamafitshane.

Ekhuluma phambilini kokuphakama kwaleliqembu, umaneja weqembu leli uWellington Mpandare uthe kabasoze bahle baqonde kwele Cameroon, okuyilapho okuzaqhutshelwa khona limidlalo, kodwa bazaqala baye elizweni lase Ethiopia.

“Sizasuka emini sekutshaye ihola lakuqala silubhekise kwele Ethiopia lapho esizalala khona kuthi ngosuku olulandelayo mhla zilitshumi lane sidlulele phambili siyefika elizweni lase Cameroon ngosuku olufanayo,” kutsho uMpandare.

Imidlalo ye African Nations Championship iyaqala mhla zilitshumi lesithupha njalo iqembu le Zimbabwe likusibaya sika Group A ndawonye leqembu elimela ilizwe eliqoqa limidlalo ele Cameroon. Amanye amaqembu akusibaya sinye ngabalisa ele iBurkina Faso kanye le Mali.

Iqembu le Zimbabwe lizakuba ngumqali wesiziba kulimidlalo njengoba lizadibana lele Cameroon emdlalweni ozavula limidlalo okusemthethweni.

Ngokwesihlanu ukuba iqembu lama Warriors liphatheke kumidlalo ye African Nations Championship selokhu lumncintiswano wasungulwayo ngomnyaka ka 2009.

Iqembu leli kalibanga lamalungiselelo amahle kodwa njengoba lithe livela kukhefu lekhisimusi kwatholakala ukuba kulabadlali kanye labaqeqetshi abalitshumi lane abalomkhuhlane we Covid – 19.

Lokhu kudale ukuba iqembu leli like lime ukuzilolonga ikanti phezu kwalokho abadlali beqembu leli bavele kabazange bedlale umdlalo wenguqu ngomnyaka ka 2020 ngoba imidlalo yeligi ingazange ibekhona kwele Zimbabwe.

Umncintiswano we African Nations Championship udlalwa ngabadlali abadlala besemazweni akubo kuphela.

Facebook Forum

XS
SM
MD
LG