Iqembu elimele ilizwe le Germany emdalweni wenguqu okuyilo ebeliphethe isicoco sezizwe zomhlaba ngemva kokunqoba kwalo ngomnyaka ka 2014 aliselakho ukusivikela lesisicoco ngemva kokuqeda imidlalo yezibaya sika Group F lisemsileni wengalane.
Iqembu le Germany litshaywe nge 2 ka nya ngele South Korea okutsho ukuba liqede imidlalo yalo lilemiklomelo emithathu njalo lisemsileni wengalane ka Group F ngemva kokwenelisa ukunqoba kanye kuphela kumncintiswano walonyaka.
Abafana be Germany badliwe nge 1 ka nya ngabe Mexico kumdlalo wabo wakuqala wezibaya basebetshaya abe Sweden nge 2 ka 1 kumdlalo wabo wesibili kodwa baphelelwe ngumphako ngemva kokunqotshwa ngabe South Korea namhla.
Komunye umdlalo wesibaya sika Group F odlalwe namhla iqembu le Sweden libhaxabule ele Mexico nge 3 ka nya okutsho ukuba liphutshe lilemiklomelo eyisithupha ndawonye lalo ele Mexico njengoba womabili lawa maqembu enelise ukunqoba kabili kusithi ele Sweden yilo elisendaweni yakuqala engalaneni ngemva kokunqoba elikwenze namhla.
Kusenjalo, izwekazi lase Africa lisele lithembele kuqembu leSenegal ukuba mhlawumbe lingenelisa ukudlula kusigaba sezibaya ngemva kokuba iqembu le Nigeria lidanise abanengi ngokunqotshwa ngele Argentina nge 2 ka 1 ngoLwesibili ebusuku.
Abafana be Nigeria banqotshwe sekusele imizuzu embalwa nje ukuba umdlalo ufike emaphethelweni njalo bebezadlulela kusigaba esilandelayo aluba umdlalo uphele bengutshiki lobhanqa leqembu le Argentina lona elidlulele phambili ndawonye lele Croatia kumaqembu abedlala ekusibaya sika Group D.
Kube khona kodwa ukukhonona kubalandeli bomdlalo wenguqu phezu kwendlela unompembe obephethe lumdlalo obuphakathi kweqembu le Nigeria lele Argentina aqhube ngayo umsebenzi wakhe njengoba Iqembu le Nigeria lincitshwe umbekwa ngemva kokuba imvimbi yeArgentina uMarcos Rojo etshaywe libhola esandleni phakathi kwebhokisi ngesikhathi lawa maqembu engutshiki lobhanqa 1 ka 1.
Intathelizindaba yezemidlalo uNash Mkokwayarira uthi kuvele kuyasolisa ukusebenza kwabonompembe nxa betshayela amaqembu ase Africa njengoba phambilini komdlalo we Nigeria le Argentina iqembu le Egypt lele Morocco lawo ephathwe ngendlela esolisayo.
Amathemba ezwekazi lase Africa asesele kuqembu le Senegal lona elizadibana lele Colombia kusasa emdlaweni owokucina owesibaya sika Group H.
Abafana be Senegal bangena kulumdlalo besendaweni yesibili engalaneni yemiklomelo belemiklomelo emine okulinani eliphethwe liqembu elihlezi esiqongweni sengalane ele Japan kuthi ele Colombia lilemiklomelo emithathu ikanti ele Poland yilo elijeke amanye emsileni wengalane lingela mklomelo.
Lesisimo sitsho ukuba iqembu le Senegal lingedlulela kusigaba esilandelayo loba lingaba ngutshiki lobhanqa lele Colombia.