Sebeqalile njalo ukuvuselela lokulungisisa inkundla zabo abeqembu lenguqu eleHighlanders ngemva kokuba umsebenzi lo umiswe yikuqhamuka komkhuhlane we Covid 19, eZimbabwe, ekuqaliseni komnyaka wonalo ka2020.
Isikhulumeli seqembu le Highlanders uRonald Moyo uthi umsebenzi usuqhubekela phambili endaweni ye Highlanders Clubhouse ngemva kokumiswa okwenyanga ezimbalwa.
“Uhlelo lolu siluqalise ekuqaleni komnyaka sasesimiswa lubhubhane lwe Covid. Sithe sesisithi siqhubekela phambili saba lodubo lwempompi kodwa sesiyilungisile njalo sikhangelele ukuba loluhlelo luzafika emaphethelweni ngemva kwenyanga ezine,” kutsho uMoyo.
Indawo yeHighlanders clubhouse ilenkundla ezimbalwa ezokuzilolongela kodwa besezingasasebenziseki ngoba sekuyizikwakwa.
Amaqembu abasakhulayo yiwo kuphela abelokhu esebenzisa inkundla ezise clubhouse ukuzilolonga kusithi iqembu elidlala kusigaba se Premier Soccer League lona lenza okokubhadalela ukuba lizilolonge enkundleni ezitshiyeneyo ezigoqela iBarboufields, iLuveve kanye le White City.
UMoyo uthe ukulungiswa kwenkundla ze clubhouse kuzaphathisa kakhulu iqembu le Bosso.
“Sikhangelele ukuthi loluhlelo luzasiphathisa kakhulu ekuphekeni abadlali bethu luphinde njalo lwenze ukuba sithole imali ngoba phela kulamaqembu azabhadala ukuba asebenzise inkundla zethu,” kutsho uMoyo.
Iqembu le Highlanders liqhatshe umasipala wedolobho lako Bulawayo ukuba alungisise inkundla zalo.
Imidlalo yenguqu kwele Zimbabwe imiswe ngenyanga kaMbimbitho kodwa kulemizamo eyokuba amaqembu aqale ukuzilolonga ensukwini ezilandelayo.