amalinks wokungena

Breaking News

Iqembu leChiefs Libopha Ziqine Kumidlalo Yalo Ngemva Kokuqala Kubi


Inguqu
Inguqu

Bekulemidlalo eyisikhombisa edlalwe ngoLwesithathu kusigaba se Castle Lager Premier Soccer League njalo emdlalweni obusenkundleni ye Luveve iqembu le Bulawayo Chiefs litshaye ele Mutare City Rovers nge 3 ka 2.

Abahlohlele iqembu le Chiefs ngabathi uFarau Matare kanye lokaputeni weqembu uGracious Mleya yena ohlohle kabili ikanti iqembu lezivakatshi lihlohlelwe ngu Jeffrey Takunda kanye lo Hussein Zvakavapano.

Iqembu le Mutare City like lakhokhela kabili kodwa lacina lidliwe njalo umqeqetshi weqembu le Chiefs uGarthly Chipuka uthi uyathokoza ukuba abafana bakhe benelise ukulungisisa amaphutha abo.

“Kasiqalisanga kuhle ngoba abafana bethu bebedelela kodwa ngiyajabula ngoba umdlalo uphele sesinqobile. Ukunqoba kwanamhlanje lokwangempelaviki eyedlulileyo kuzakwenza sidlale leqembu le FC Platinum singela kwesaba ngoba sesithole imiklomelo eyisithupha phakathi kweyithoba munwe munye,” kutsho uChipuka.

Impumela yangoLwesithathu itshiye iqembu le Bulawayo Chiefs lilemiklomelo engamatshumi amabili lathoba munwe munye njalo lihlezi endaweni yetshumi engalaneni yemiklomelo.

Kweminye imidlalo edlalwe ngoLwesithathu iqembu le Ngezi Platinum Stars libhaxabule ele Shabanie Mine nge 5 ka 1. Limpumela itsho ukuba iqembu le Ngezi selitshiywa ngomklomelo owodwa ngele FC Platinum lona elinqotshwe nge 1 ka nya ngele Harare City.

Iqembu le Chapungu litshaye ele Black Rhinos nge 1 ka nya, ele Bulawayo City linqotshwe nge 1 ka nya ngele Herentals, iqembu le Yadah lele Dynamos abe ngutshiki lobhanqa kungela elenelise ukulitshyela emambuleni kuthi ele ZPC Kariba lele Nichrut abe ngutshiki lobhanqa 1 ka 1.

NgoLwesine kulemidlalo emibili lapho iqembu le CAPS United elizadibana khona lele Triangle kuthi ele Highlanders lizadlala lele Chicken Inn.

XS
SM
MD
LG