Iqembu lomdlalo wenguqu ele Tsholotsho linqobe okwakuqala emidlalweni eyalonyaka eyesigaba se Castle Lager Premier Soccer League lapho litshaya ele Highlanders nge 1 ka nya enkundleni ye Barbourfields ngoLwesithathu.
Umgadli uLucky Vundla nguye ohlohlele iqembu le Tsholotsho ihlandla lakuqala elomdlalo selisiya emaphethelweni.
Limpumela itsho ukuba iqembu leZiqholo zeZhwane likhuphule inani lemiklomelo eselilayo laya kutshumi lambili okulinani eliphethwe liqembu le Bantu Rovers lona osekuyilo eselijeke amanye amaqembu engalaneni ngoba lihlohlwe kanengi kule Tsholotsho.
Umqeqetshi weqembu le Tsholotsho uDarlington Dodo utshele intathelizindaba ukuba uyathokoza ngokunqoba kweqembu lakhe kodwa okuqakathekileyo yikuba badlale kuhle lakumidlalo yabo elandelayo.
Ngakwelinye icele umqeqetshi weqembu le Highlanders, uErol Akbay, ukhale ngokuthi akalabo abagadli abangalitshayela emambuleni ngoba abadlali bakhe amathuba bayawakhanda kodwa bayehluleka ukuwasebenzisa.
Komunye umdlalo odlalwe ngoLwesithathu iqembu le CAPS United linqobe ele Black Rhinos nge 2 ka 1 emdlalweni oqhutshelwe esigodlweni iHarare njalo limpumela idale ukuba abafana beMakepekepe beqanse bayehlala endaweni yetshumi engalaneni yemiklomelo belemiklomelo engamatshumi amabili lesikhombisa.
Imidlalo iqhubekela phambili kusasa njalo iqembu le How Mine likhangelelwe ukudlala lele Dynamos enkundleni yeBarbourfields loba nje kulemibiko ethi abadlali beqembu le How Mine bakhalala umsebenzi bekhonona ngokungatholi iholo.