Ukaputeni weqembu elimela ilizwe le Zimbabwe emdlalweni kakhilikithi uHamilton Masakadza uthi bazimisele ukuncintisana leqembu lezethekeli ele Pakistan emidlalweni eyohlobo lwe One Day International eqala kusasa edolobheni lako Bulawayo.
Iqembu le Zimbabwe libize abadlali abambalwa abangazake bedlale kuzinga laphezulu ukuba babe yingxenye yeqembu elizadibana lele Pakistan kumncintiswano we One Day International Series oqala kusasa edolobheni lako Bulawayo.
Laba ngabagoqela uLiam Roche kanye lo Tinashe Kamhunukamwe bona abaqala ngqo ukuba yingxenye yeqembu lesizwe elabobaba ikanti omunye osakhulayo obizwe kuleliqembu uRyan Murray yena useke waba yingxenye yeqembu loba engazake edlale.
URoche ubengukaputeni weqembu lamajaha aleminyaka elitshumi lathoba munwe munye elimela ilizwe emdlaweni kakhilikithi njalo ubizwe ngemva kokuqhuba kuhle kumidlalo eye Pro50 Championship.
Laba badlali babizwe ngoba kulabadlali abambalwa abaziwayo abaxabana lenhlanganiso ye Zimbabwe Cricket phezu kweholo kusithi abanye bakhona balimele.
Ekhuluma lentathelizindaba zemidlalo namhla emini uMasakadza uthe yena inkuthazo abayipha laba badlali abasacathulayo yikuba bedlale bekhululekile bengacabangi okunengi.
Kutsho uMasakadza: “Sihlele ukuba sidlale sikhululekile abadlali bedlale bengagqize qhakala ukuze bengadlali becabanga ukuba kukhona okukhangelelwe kubo. Ngaleyo ndlela bazahlasela iqembu lezivakatshi ngoba bedlala bekhululekile, okuyiyo into okumele iyenzeke kuloba yiwuphi umdlalo.”
Iqembu le Zimbabwe lele Pakistan zingena kumncintiswano we ODI Series ngemva kwensuku ezimbalwa edibane kumidlalo eyohlobo lwe Twenty20 ndawonye leqembu le Australia.
Iqembu le Pakistan yilo eliphakamise isicoco ngemva kokunqoba ele Australia ku final ngama wickets ayisithupha.
Lakho kumncintiswano we T20 iqembu le Zimbabwe lidlale lingela abadlali ababalisa ababengokaputeni uBrendan Taylor lo Graeme Cremer kanye uSikandar Raza.
Imidlalo ye ODI Series iqala ngoLwesihlanu mhla zilitshumi lambili kunyanga kaNtulikazi njalo izadlalelwa enkundleni ye Queens Sport Club edolobheni lako Bulawayo.
Facebook Forum