Uzulu uthi iqula likaMongameli weSouth Africa uMnu Cyril Ramaphosa elizakuya eHarare yiloba nini, kumele libe lenjongo ecacileyo ukuze liphumelele kumlandu wokudinga isisombululo kudaba lweZimbabwe.
URamaphosa wazise ngempelaviki ukuthi uzathumela iqula lakhe okesibili ukuyaxoxisana labebandla leZanu PF, abamabandla aphikisayo afana leMDC Alliance, abenhlanganiso ezizimeleyo lozulu jikelele ngokuhluphayo eZimbabwe lokuthi kungalungisiswa njani.
Uhambo lolu luza ngesikhathi uhulumende kaMongameli Emmerson Mnangagwa esetheswa umlandu wokwephula amalunga oluntu lokubopha abalwela amalungelo labebandla leMDC Alliance mahlayana.
Amanye amalunga eZanu PF afana lesikhulumeli sikaMnangagwa, uMnu George Charamba, athi akakwamukeli ukungenela kweleSouth Africa kudaba lweZimbabwe.
Kodwa abenhlanganiso ezizimeleyo kanye labeMDC Alliance bathi bayalisekela inyathelo likaMongameli Ramaphosa ngoba indubo zeZimbabwe zithinta ilizwe lakhe.
“Sifisa ukuthi nxa bebuya balalele konke okuzakhulunywa ngabantwana beZimbabwe okuhluphayo,” kutsho ilunga leMDC Alliance uMnu Edwin Ndlovu.
“Kumele baqale ngokukhangela udaba lokhetho luka2018, ukuthi kulokungazwisisani ngalo. Besuka lapho kumele bakhangele udaba lokwephulwa kwamalungelo oluntu nguhulumende weZanu PF.”
UMnu Ndlovu wengeze wathi njengebandla leMDC Alliance, bafuna inkulumo lezi zikhokhelele ekubunjweni kukahulumende ozabamba okwesikhatshana, i-transitional authority andubana kuyiwe kukhetho.
Lanxa amanye amalunga eZanu PF esithi, eleSouth Africa akumelanga lingenele kundaba zeZimbabwe, abanye abafana loMnu Believe Gaule bathi akulalutho olubi ukuthi omakhelwane babonisane nxa omunye elodubo.
Kodwa uGaule uthe lokhu akutsho ukuthi eleSouth Africa selingatshela eleZimbabwe okokwenza.
“Omakhalwane bayaphathisana sibili, ikakhulu thina leSouth Africa, silobudlelwano obuhla kakhulu njalo lapho okulohlupho khona kumele sincedisane,” kutsho uMnu Gaule.
“Ngibona kuzasiza njalo ukuthi kuvele iqiniso iSouth Africa izibunele ukuthi akula kwephulwa kwamalungelo oluntu okukhulunywayo, ngamanga kuphela.”
