amalinks wokungena

Breaking News

Isicelo sikaMafume EseBail Sidluliselwa Phambili


U-Mayor Jacob Mafume weHarare legqwetha lakhe uTonderai Bhatasara
U-Mayor Jacob Mafume weHarare legqwetha lakhe uTonderai Bhatasara

Umantshi Morgan Nemadire, umiswe phambi komthethwandaba esetheswa icala lokuqhuba imisebenzi yenkohlakalo esemsebenzini waphiwa ithuba lokuba ahlawulele imali yesibambiso sebail.

Umantshi uNgoni Nduna uhlawulise uNemadire inkulungwane ezinhlanu zamadol$5,000RTGS ukuze athoniswe esuka ngekhaya njalo kuthiwe aphindele edale mhla ka 3 Zibandlela.

Utshelwe ukuba ahlale emzini wakhe kukheli ayinikeze idale, engaze akhulumisana labafakazi kanye lokuthi ayetshiya ugwalo lokuhambisa ipasipoti emthethwandaba.

U Nemadire wetheswa icala lokupha isigwebo esiphansi sokuhlawulela imali ye fayindi yamadola angamakhulu ayisikhombisa kwesinye isizalwane se Venezuela esangena eZimbabwe silokudakayo kohlobo lweCocaine elesisindo samakilogram amahlanu, okwakungathengiswa ngenkulungwane zamadola angamakhulu phose amahlanu amadola akweleMelika - US$469, 000. emkambo wensitha.

Ngemva kokuba eyethule lesi sigwebo, uNkosazana Delcy Deymar Rodriguez Guererro, laye owayengene kuleli evelela kweleBrazil wahle wabuyiselwa kibo.

Lesi sigwebo asizange sijabulise abohlangothi lwe Special Anti-Corruption Unit - SACU abasebenza phansi kwehofisi kamongameli bona abahle baqala ukucwayisisa loludaba besebenzisana lamapholisa okwakhokhelela ukubotshwa kukaNemadire.

Kolunye njalo udaba olusemithethwandaba i- High Court ayisanelisanga ukuhluza isicelo sika Mayor we Harare, umnumzana Jacob Mafume, sokuthi avunyelwe ukuhlawulela isibambiso sebail edabeni alwetheswayo lwenkohlakalo.

UMahluli Benjami Chikowero ube khangelelwe ukuhluza loludaba ngoMvulo kodwa akusabanga njalo ngoba abatshutshisi bekhale ngokuthi abatholanga isikhathi sokulungiselela ukuhluzwa kwalesi sicelo njengoba sikhwezwe abantu besiya kukhefu leKhisimusi.

Amagqwetha kaMafume akhweza lesi sicelo, mhla ka 23 Mpalakazi kodwa abatshutshisi bathi baze basibone lamuhla.

Igqwetha likaMafume umnumzana Tonderai Batasara ulandisa ngokwenzakale namhlanje.

“Njengoba abatshutshisi bebelokhu bengayilethi leyo mpendulo yabo, bekungela ngenye indlela ngaphandle kokuba sivume ukuthi luzwiwe kusasa ngo quqrter past 11 ( 11:15am ) loludaba lanxa senze lokho silokukhonona okukhulu. ”

Mhla ka 17 mpalakazi umthethwandaba we Magistrate wancitsha uMafume ithuba lokuhlawulela imali yesibambiso iBail edabeni alwetheswayo lokuthi wayesephazamisa ukuqhutshwa kophenyo ecaleni eletheswayo lenkohlakalo lapho okuthiwa watholisa udadewabo uRotina Mafume indawo yokwakha kanye lonobhala enkampanini yakhe u Rutendo Muvuti.

UMantshi uNgoni Nduna uthi uMafume ulakho ukuqhubeka engenela kuloludaba nxa engamtholisa ithuba lokuhlawulele isibambiso seBail. Loludaba lukaMafume lukhangelelwe ukuqhubeka njalo emthethwandaba mhla ka 28 Zibandlela ngomnyaka ozayo.

Isakhamuzi saseHarare, umnumzana Tafadza Chigandiwa upha umbono wakhe ngaloludaba.

“AmaCourts lawa aweZimbabwe, hayi, indlela ayenza ngayo, ayisiyo ndlela eright. Nxa befuna ukuthi umuntu akhitshwe enkantolo, uyakhitshwa kodwa nxa bengafuni akhitshwe ekantolo, kakhitshwa. Angazi ukuthi why, lokhe bevalele uMayor uJacob Mafume enkantolo. Ngibona angazthi lilungelo lakhe elokuthi ethole iBail.”

Kusenjalo umphathintambo wezabelo umnumzana July Moyo usemise umsebenzi uMafume lomsekeli wakhe, uCouncillor Luckson Mukunguma kusukela khona manje besetheswa umlandu wenkohlakalo.

Lokhu bekusencwadini enikezwe uMukunguma okugcizelelwe ngosebenza ehlangothini lwezokukhulumisana lozulu kumanisipala, umnumzana Innocent Ruwende.

Kolunye njalo udaba, umthethwandaba wehlulekile ukuhluza udaba lwesinye isifundi sekolitshini le University of Zimbabwe, uAllan Moyo, yena obotshwe mhla ka 7 Mpalakazi labanye bakhe besetheswa icala lokutshotshozela uzulu ukuba atshengisele ngendlela elodlakela.

Lanxa abanye bakhe abotshwa labo abayisikhombisa bavunyelwa ukuba bahlawulele imali yesibambiso seBail emthethwandaba kaMantshi, uMoyo ulincitshiwe lelothuba umthethwandaba usithi ulakho ukubaleka elizweni icala lakhe lingakahluzwa.

Igqwetha lika Moyo, umnumzana Obey Shava, uthi umangele ukuba lesi sicelo besingekho lakuluhlu lwendaba obekumele zihluzwe ngoMvulo.

“Ekufikeni kwethu sithole ukuba kalukho kulezo ndaba obekumele zizwiwe lamuhla, asikwazi ukuba kuyini okwenzakeleyo. Kungakho sesifuna ukudingisisa ukuba kungani loludaba lungasamiswanga phambi komthethwandaba. Sizazama konke okusemandleni ethu ukuba luzwiwe kusasa loludaba. ”

UMoyo labanye bakhe babikwa baya esilindweni samabhasi eseCopacabana eHarare mhla ka 3 Ntulikazi, ngenhloso yokukhuthaza uzulu ukuthi atshengisele efuna uMongameli Emmerson Mnangagwa, asuswe esihlalweni ngoba esehlulekile ukubusa ilizwe.

Udaba lokwenzakale emithethwandaba siluphiwa nguMavis Gama
please wait

No media source currently available

0:00 0:06:04 0:00
XS
SM
MD
LG