amalinks wokungena

Breaking News

Isidlule Esibangeni se3rd Wave yeCoronavirus iSouth Africa


People queue to be tested for COVID-19 at the Livingstone Hospital in Port Elizabeth, South Africa, Nov. 13, 2020.

EleSouth Africa seliphumile kubanga lesithathu kumbe i-3rd wave yokuhlasela lubhubhane olweCoronavirus ngemva kokwehla kakhulu kwenani labantu asebehlolwa befunyanwa belegcikwane leli ngelanga.

Inhlanganiso ecwaninga ngezemikhuhlane ethelelwanayo kweleSouth Africa eyeNational Institute of Communicable Diseases (NICD) ithi iSouth Africa iphume kuhlandla lesithathu leli ngemva kokuba inani labahlaselwa ngumkhuhlane wecorona ngelanga lehle lisuka esiqongweni ku 16,000 ngoNtulikazi laya lapho elikhona khathesi ngaphansi kwamakhulu ayisithupha (below 600).

Linhlanganiso ithi ukuze babone ukuthi ilizwe selingenile loba ukuphuma kuhlandla kumbe iwave yecorona kufanele isibalo sabahlaselwayo phakathi kwamalanga ayisikhombisa sehle size sifike kusilinganiso sokulitshumi lanhlanu ekhulwini senani alibe phezulu kuwo wonke (down to 15% of the peak).

Ithi inani labantu abahlaselwa ngelanga selikusilinganiso sokuhlanu ekhulwini (5%) lisuka kumatshumi amathathu (30%) ngoNtulikazi.

Ingcitshi kwezokucwaninga ngamagciwane enhlanganisweni yeNICD unkosikazi Michelle Groome uthi lezi zindaba ezimnandi lobanje kungatsho ukuthi abantu bengasalandeli imithetho yokwenqabela ukumemetheka kwecoronavirus.

“Njengelizwe sesiphumile ku3rd wave lobanje kulezabelo ezintathu ezilokhu ziphakathi kwayo.”

Ukuphuma kweSouth Africa kuhlandla lesithathu yinto esiyemukelwe ngenjabulo yizizalwane zeZimbabwe kweleSouth Africa. Inengi labo lihamba lokubuya nzima eZimbabwe njengoba uhulumende weZimbabwe engakavuleli ukuhamba kwabantu ngokugcweleyo ngenxa yamanani amakhulu abahlaselwe yicoronavirus kweleSouth Africa.

Abanye bebevele besesabela ukuthi bazahamba nzima ngekhisimusi nxa amanani abahlaselwayo angaqhubeka ekhwela. Ukwehlake sekubaphe ithemba lokuthi umongameli Cyril Ramaphosa funa ayekethise eminye imigoqo yokwenqabela icorona.

Isizalwane seZimbabwe umnumnzana Khulekani Dube ngomunye wabemukela lezi indaba ngezandla zombili.

“Ngibona engathi kuyasiza kakhulu ngoba nanku izibalo ziyayehla. Nxa sesifika ku500 kukhomba khona ukuthi sekuzanyiwe ukuthi kulawulwe linto kakhulu. Sibonga njalo ukuthi loba ngabe u4th wave esiza angathola abantu sebejovile mhlawumbe angake abenamandla atheni okuthi aphakame afane lalawa ebesiwabona ngoba bekukubi kakhulu. Sibonge njalo ukuthi nathi singazithola sesivumelekile sesisisiyadlala amakhisimusi sesikhululekile emakhaya sekuvulwe lemingcele.”

KweleSouth Africa sebephose bafike izigidi ezintathu (close to 3 million) asebehlaselwe yiCoronavirus. Abantu asebebulewe yilo umkhuhlane sebefika izinkulungwane ezingamatshumi ayisitshiyagalombili lasikhombisa (over 87.000).

Asebehlatshwe amajekiseni okuvikela icorona agcweleyo sebesedlula izigidi eziyisitshiyagalombili (8.4 million).

Njengobake okwamanje kweleSouth Africa kungavunyelwa ukubuthanisa abantu abedlula amakhulu amahlanu (more than 500), umculi weZimbabwe ocula umdumo wezokholo eqenjini leCilongo Lesikhombisa uPhillip Dube uthi bakhangelele ukuthi kungekudala umongameli Ramaphosa avumele ukubuthana kwabantu abanengi ngoba le kuyiyo indlela abaphila ngayo njengabaculi.

“Kuyangijabulisa nxa ngibona isibalo seCovid 19 sisehla kanje. Kutsho ukuthi abantu bayalandela imigomo. Kuyangijabulisa ngokuthi nxa sisiya kulevel 1 sesiyakhona ukwenza imicimbi endaweni esitshiyeneyo.”

Uthi bangathokoza kakhulu ukuthi babuyele empilweni yabo yokuthokozisa umphakathi ngamaculo.

Facebook Forum

XS
SM
MD
LG