amalinks wokungena

Breaking News

Isidumbu sikaTsvangirai Sesifikile eZimbabwe


Isidumbu sikaMnu Morgan Tsvangirai sifike eZimbabwe ngoMgqibelo sivela eSouth Africa lapho abhubhele khona ngoLwesithathu.

UTsvangirai ubulawe ngumkhuhlane wemvukuzane (colon cancer) eseleminyaka yokuzalwa engamatshumi ayisithupha lanhlanu.

Uzabekwa emzini wakhe eBuhera ngoLwesibili. Inkulungwane zabantu zihlangabeze isidumbu sakhe egcekeni lendizamtshina eleRobert Gabriel International Airport eHarare.

Isidumbu sakhe sithe sifika sathathwa yiziphathamandla zikahulumende zaya laso enkambeni yamasotsha eyeOne Commando Barracks.

Lokhu kumangalise abantu abanengi. Kodwa isiphathamandla seMDC-T uMnu Nelson Chamisa uthi waziswe ukuthi lokhu yikho okwenziwayo nxa uhulumende ethe wangenela emngcwabeni womuntu oke waba yisiphathamandla sakhe.

UTsvangirai waba yinhloko kahulumende womanyano phakathi kuka2009 lo2013.

Uzulu wedolobho lakoBulawayo ovela kunhlangothi zempilo ezitshiyeneyo uhlangene laye ngoMgqibelo eLarge City Hall emthandazweni wokukhumbula uTsvangirai.

Umbuthano lo uhlanganise abantu abavela kumabandla ezombusazwe lawezokholo ehlukeneyo kanye lozulu nje jikelele.

Abanengi abakhulume kulumbuthano baveze ukudana okakhulu ngokufa kukaTsvangirai besithi usebenze kanzima kumzabalazo wokudinga iZimbabwe entsha elombuso okhululekileyo ehlinipha njalo lamalungelo oluntu.

Umkhokheli weMDC uMnu Welshman Ncube uchaze uTsvangiriai njengeqhawe ebelikhathalela abanye abantu nxa besebunzimeni lanxa laye ebesesimeni esibi.

Uthe wazibonela lokhu ngesikhathi bebotshiwe bonke.

please wait

No media source currently available

0:00 0:03:01 0:00
XS
SM
MD
LG