Isigodlo seMelika eZimbabwe sithi umqondisi waso uMnu Thomas Hastings uhlangane lesithunywa seUnited Nations, uNkosazana Alena Douhan, ngoLwesithathu wamchasisela ukuthi izijeziso ezetheswa amalunga eZanu PF yiMelika aziphazamisi uzulu weZimbabwe makhaza kodwa ziphazamisa labo abazifakelwayo.
UDouhan unxuswe nguhulumende kaMongameli Emmerson Mnangagwa ukuthi ayezibonela umthelela omubi ibandla leZanu PF elithi ubangelwa yizijeziso lezi kuzulu.
Kodwa isigodlo lesi sithi uHastings uchasisele uDouhan ukuthi ilokho akusilo qiniso njalo wamtshela lokuthi iMelika idinga ukugxilisa ubudlelwano bayo leZimbabwe kwezamabhizimusi.
Isigodlo lesi siphakathi kokuqhuba umkhankaso enkundleni yeTwitter onxusa amabhizimusi eZimbabwe afuna ukuxhasana laweMelika ukuthi aze phambili.
Okwenziwa yiMelika lokhu kuphikisana lokukhulunywa nguhulumende weZanu PF, yena othi uyehluleka ukuvuselela umnotho ngoba izijeziso lezi zimvimba ukwenza ibhizimusi lamankampani eMelika lamanye aphetsheya.
Ingcwethi kwezombusazwe uMnu Effie Dlela Ncube utshele iStudio 7 ukuthi ukunxusa amabhizimusi eZimbabwe okwenziwa yisigodlo seMelika linyathelo elihle kakhulu.
