Isigodlo seMelika, iWashington DC, sesibophise amaqembu abantu abamhlophe abazonda eminye imihlobo phezu kodlame olwadalwa ngamalunga alawa maqembu labasekeli bakaMnu Donald Trump ephalamende mhlaka 6 ngoZibandlela.
Amaqembu la abalisa eleProud Boys leleOath Keepers, wona azakala ngokubandlulula lokuzonda abantu abamnyama leminye imihlobo.
Igqwetha elikhulu lesigodlo lesi, u-Attorney General, utshele intathelizindaba izolo ukuthi bafuna abasolwa bahlawulise imali lanxa engatshongo ukuthi enganani.
Amanye amalunga amaqembu la avele aphakathi kokuthonisiswa ngamacala okuhlasela iphalamende ezama ukuvimba ukungena kukaMongameli Joe Biden embusweni ngemva kokunqoba uMnu Donald Trump.
Iphalamende yona iphezu kophenyo oluphathelane laloludlakela njalo iphakathi kokuhlaziya ubufakazi ebuphiwe ngowayengumcebisi kaTrump uMnu Mark Meadows.
Ukuhlaziya loludaba sixoxe lengcwethi kwezombusazwe uMnu Effie Dlela Ncube yena otshele iStudio 7 ukuthi kubalulekile ukuthi iMelika ilwisane lenzondo ekulabo abazonda eminye imihlobo.
