amalinks wokungena

Breaking News

Isimo Esibi Semigwaqo YakoBulawayo Sikhalisa Abatshayeli


Isimo semigwaqo koBulawayo

Abatshayeli bezimotha abanengi bathi ukugugudeka kwemigwaqo yakoBulawayo sekuyingozi enkulu kuleli dolobho.

Lanxa uhulumende wethula uhlelo lokulungisisa imigwaqo elizweni lonke jikelele, koBulawayo uzulu uthi lokhu akwenelanga ngoba khathesi yisikhathi sezulu ingozi ezingabakhona edolobheni zibangelwa yisimo esibi semigwaqo lokhu zisanda okwethusayo.

Umnumzana Mthabisi Ncube isakhamuzi sakoBulawayo ongumtshayeli uthisekuyingozi enkulu ukutshayela nxa izulu lisina ngenxa yamagodi akhona emigwaqweni.

“Kulobunzima ngoba umakungenzeka udrive izulu lisina lamagodi lawa asetown uyakwanisa ukuthi igodi ungaliboni ligcwele amanzi ulitshaye imota ihle ife kumbe uthuze imota eseceleni.”

Umnumzana Meluleki Mloyi umtshayeli wemota encane uthi akusela migwaqo emalokitshini amanengi akoBulawayo.

"Sihamba sifelwa ngamashocks lamathaya ngabe uhulumende ubelozwelo labantu umgwaqo ufile singalandela ULuveve Road akuselamgwaqo siyengena emalokitshini kuboNtumbane amapothole akhona sungathola umuntu phakathi.”

UMloyi uqhubeke ethi imali ezithathwa kumaroadblock lezihlawulwa kuZINARA kumele zenze umsebenzi wazo.

“Sikhangele imali zonezo ezithathwayo kumaroadblock nxa kuyikuthi imali zonezo ziyakuhulumende ngabe bayasilungisela umgwaqo ngoba umgwaqo asiselawo. Laba adebesavala befaka inhlabathi labo khathesi sekungaphezu kwamandla abo ngoba izulu nxa lisina ihle ikhukhulwe lizulu, etown amanzi ageleza aze angene emashop kutshengisa ukuthi amadragnage awasekho kwahlula kudala.”

Nyakenye ikhansili yakoBulawayo yaveza ukuba imigwaqo engaphezu kwesilinganiso samatshumi ayisikhombisa lanhlanu ekhulwini- 75% isiguge yedlulisa isikhathi okumele ukuthi ilungisiswe.

Imizamo yokukhulumisana lekhansili ngokulungiswa kwemigwaqo yehlule kodwaekupheleni komnyaka odluleyo ka2021 uMayor wakoBulawayo umnumzana Solom Mguni, ubeluncoma okwamagama uhlelo olweEmergency Road Rehabilitation olukhangelelwe ukulungisisa imigwaqo engamatshumi ayisithupha lanhlanu ngendleko yezigidi ezingamakhulu angaphezu kwesithupha zamadollar eZimbabwe-RTGS625 Million. Kodwa ethi imigwaqo yakoBulawayo idinga amadola eMelika ayizigidi eziyisikhombisa-USD700 million ukuyilungisisa.

Facebook Forum

XS
SM
MD
LG