Uhulumende weleSouth Africa usesule isinqumo sakhe sokuthi kusiyafika mhlaka 31 kulinyanga, izizalwane zakuleli eziphansi kohlelo lweZimbabwe Exemption Permits kumele zibe sezilamaphetshana (ama-receipts) aveza ukuthi sezifake izicelo zokuba phansi kwamanye amaviza ukuze zenelise ukuqhubeka zilamabhuku emabhanga, ama-bank accounts.
Isinqumo lesi siza ngemva kokwazisa kukahulumende kumaviki asanda kwedlula ukuthi akasoze avuselele ama-special permits la ekupheleni kwawo lonyaka, wona awaphe izizalwane zeZimbabwe ezingu250,000 ngomnyaka ka2009.
Wathi abazakwehluleka ukungena kweminye imihlobo yama-visa phakathi komnyaka olandelayo bazaxotshwa kulelolizwe. Besokulokuphithizela lamabhanga esevala ama-bank accounts abantu laba, okuyinto edale ukuthi ezinye inhlanganiso ezimela abokuza ziye emthethwandaba.
Lanxa abezindaba abafana labeBloomberg besithi isimemezelo sayizolo sitsho ukuthi uhulumende weleSouth Africa akaseyi kuxotsha abeZimbabwe abalama-permits la, umkhokheli wenhlanganiso yeZimbabwe Community in South Africa uMnu Ngqabutho Mabhena uthi akunjalo.
Amazwi kamabhena agcizelelwe ngumkhokheli wenhlanganiso yeAfrican Diaspora Forum uDr Vusumusi Sibanda.