Abakubandla leZanu PF bathi isethekeli senhlanganiso yomhlaba wonke jikelele eyeUnited Nations esikwele Zimbabwe kumele sitshelwe ngabantu bonke ukuba zibhiza umnotho izijeziso zenotho ezafakelwa inkokheli yebandla elibusayo.
Kodwa amabandla atshiyeneyo athi ibandla leZanu PF yilo elithwalise nzima uzulu.
UMabutho Moyo, okuhlangothi lwabatsha kubandla leZanu PF, ngomunye wabathi kumele uzulu akhankasele ukuba kwesulwe izijeziso zenotho ezafakelwa inkokheli yebandla leli.
UMnu. Innocent Ndibali, okhokhela ibandla leEconomic Freedom Fighters Zimbabwe, uyakusekela lokhu.
Akwaziwa ukuba uDouhan uzakhuluma labantu abangaki eZimbabwe.
UMnu. Kwanele Hlabangana, okhokhela ibandla leRepublican Party of Zimbabwe, uthi uzangena emhlanganweni oqoqwe nguDouhan labanye bakhe.
UMnu. Felix Magalela Mafa, umsekeli wesikhulumeli sebandla leMDC Alliance, uthi abantu kumele beqaphele okuzekwenziwa nguNkosazana Elena Douhan.
Kulabanye abathi kumele kuhlolisiswe umonakalo odalwa yizijeziso lezi ezafakwa lilizwe leMelika, eleBhilithane lamanye kulandela udlakela olumangalisayo eZimbabwe okuthiwa lwalutshotshozelwa libandla leZanu PF.
UMnu. Dumisani Nkomo, ingcwethi ecubungula ezombusazwe, uthi uhambo luka Nkosazana Douhan luqakatheke kakhulu.
EleMelika lafakela izijeziso zenotho abakubandla leZanu PF abedlula amatshumi ayisitshiyangalombili – 86 kanye lamankampani angamatshumi amahlanu lasithupha – 56.
