amalinks wokungena

Breaking News

Isizalwane seZimbabwe Esicatshangelwa Ukuthi Sabulala Umlimi Omhlophe Simiswa Emthethwandaba


UJabulani Dube lomunye wakhe uMokgalemi Maleya abetheswa icala lokubulala umlimi omhlophe kwele Botswana.

UJabulani Dube odabuka ePlumtree, eZimbabwe obesehlala kwele Botswana, umiswe phambi komthethwandaba ngoLwesibili esetheswa icala lokubulala ilunga ledale lephalamende yeBotswana ngempelaviki kulandela ukuxabana kwabo.

UDube ubesebenzela umuyi obelilunga lebandla elibusayo leBotswana Democratic Party (BDP).

uJabulani Dube lomunye wakhe uMokgalemi Maleya abetheswa icala lokubulala umlimi omhlophe kwele Botswana.
uJabulani Dube lomunye wakhe uMokgalemi Maleya abetheswa icala lokubulala umlimi omhlophe kwele Botswana.

UDube kanye lomunye wakhe oyisizalwane seBotswana, uMokgalemi Maleya, bamiswe phambi komthethwandaba emzini weMolepolole duzane ledolobho leGaborone, besetheswa icala lokubulala uMnu. Isaac Davids.

Ababili laba, abakhanye bebunile, bazaphindela njalo emthethwandaba mhla ziku 30 ngoZibandlela ngoba amapholisa athi awakaqedi ukucwayisisa icala leli.

Bobabili kade beqhatshwe nguDavids epulazini lakhe elingaphandle kweGaborone.

Amaphepha aphambi komthethwandaba abika ukuba uDavids ufike epulazini ngeSonto edinga ukuthengisa ezinye inkomo zakhe.

Kodwa wathola uDube, oleminyaka engamatshumi amathathu lanye yokuzalwa, loMaleya bengekho bebikwa bese mavikilini eduzane, bezilibazisa.

UDavids ubikwa efike esidla amahabula wathela uDube impama, ezondele ukuthi kungani bengekho epulazini emsebenzini.

Kubikwa ukuthi bahle baqala ukulwa khonapho uDavids ecela omunye ukuthi amqhubele umbhobho owawusemoteni, kodwa kasenelisanga ukuwuthola ngoba wagwazwa kanengi esifubeni lesiswini.

UDube loMaleya abakangeni kusibanga sokuthi batsho ukuthi bazibona belecala noma hatshi, njalo udaba lwabo lukhangelelwe ukudluliselwa emthethwandaba ophezulu oweHigh Court.

Amapholisa athi indaba ezifana lalezi lapho abaqhatshi abalwa lezisebenzi zibhahile, okungamangalisi ikakhulu abeZimbabwe abalabanye babo abasebenza emapulazini.

Omunye wamapholisa uthe, "Zinengi indaba esizizwa emaphepheni ikakhulu ngesiphatho kanye lesimo emapulazini. Uyakwazi ukuthi inengi elisebenza khona ngabe Zimbabwe, ngoba yiyo imsebenzi etholakala kalula njalo abeBotswana bengakhwabithi ukuyithatha. Ngakho indaba zokufuthelana emapulazini zivamile."

UMnu. Dube kanye loMaleya bazahlala esitokisini belinde ukuphindela njalo emthethwandaba, ngoba kusesatshwa ukuthi, ngenxa yecala abalibhekileyo, balakho ukubaleka.

Bekugcwele emthethwandaba uzulu efisa ukuzwa ukuthi kwahamba njani ekubalaweni kukaDavids, yena obesaziwa ngokuthi nguFokon Bastard njalo engumuntu ololaka.

UMongameli Ian Khama wethekelele imuli kaDavids ukuyabakhalela ngokubehleleyo.

Kuthiwa Isizalwane seZimbabwe Sibulele Umqhatshi Omhlophe
please wait

No media source currently available

0:00 0:02:15 0:00

Facebook Forum

XS
SM
MD
LG