Kulesizalwane seZimbabwe esesisinike uhulumende amalanga alitshumi lane – 14 - ukuthi sesule umthelo wokuthumeza imali kusetshenziswa omakhalekhukhwini lobulembu beInternet sisithi umthelo lo wephula isisekelo sombuso welizwe.
UMnu. Arnold Mutsondi, usomabhizimusi weHarare, usecele amagqwetha akhe ukuthi anike uhulumende isikhatshana lesi ukuthi esule umthelo obizwa ngokuthi yi-Intermediated Money Transfer Tax owethulwe ngoMvulo nguMnu. Mthuli Ncube, umphathintambo wezemali.
UNcube ukhuphule umthelo lo osuke ku5 cents nxa uthemeza imali kungelani ukuthi yimalini waya ku 2 cents idola linye ngalinye.
Igqwetha lika Mutsondi, uMnu. Alex Majachani, uthi okwenziwe nguhulumende kwephule isisekelo sombuso welizwe ngoba kumele uhulumende anike uzulu isikhathi sokukhuphula umthelo we-Tax.
“Kukho konke okuthumeza ngomakhalekhukhwini kumbe ebulenjini beInternet kumele ubhadala i2 cents idola linye ngalinye. Nxa uthumeza i$1,000 kumele ubhadale $20. Ngakho-ke uMutsondi uthi lokhu akukho emthethweni.”
Uthi abantu bethuswe kakhulu ngumthelo lo owasungulwa ngomnyaka ka2003.
“UMutsondi uthi kawesulwe umthelo lo ngoba wethusa abantu okumangalisayo njalo kawukho emthethweni. Uthi uhulumende ulakho njalo ukuthi uhulumende anike uzulu isikhathi esithize engakethuli umthelo lo owethusa okumangalisayo.”
Kukhanya bebanengi abantu abasekela okwenziwa nguMutsondi. Omunye wabo nguMnu. Michael Ndiweni, umqondisi weBulawayo Vendors and Traders Association.
UNdiweni uthi loba uhulumende elelungelo lokukhuphula umthelo we-Tax, abantu labo bayenelisa ukuthi bangavumi imithelo ebabisela muva.
Kodwa-ke uMnu. Believe Gaule webandla leZanu PF uthi kumele uzulu anike uNcube labanye bakhe ithuba lokuthuthukisa umnotho lobanje kukhuphuka umthelo we-Tax.
Uphinde wathi kahlukuluzwa ngokwenziwa nguhulumende.
Kasenelisanga ukukhuluma ngodaba lolu loNcube. Uhulumende uthi ukhuphule umthelo lo usenzela ukuvuselela umnotho welizwe.
Kusenjalo, amalunga edale lephalamende awebandla eliphikisayo eleMDC asole uMnu. Ncube ngokungabikhona kulelidale ngoLwesithathu ukuzophendula imbuzo ngenyathelo elisanda ukuthathwa nguhulumende elokukhuphula umthelo ozabhadalwa emabhanga, kanye leminye imizamo yokuthuthukisa umnotho welizwe esolwa ngabanengi.
Sixoxe lomkhokheli weMDC edale lephalamende uNkosazana Thabitha Khumalo ukuze sizwe okunengi ngaloludaba, lokunye obekuhlafunwa.