Inhlanganiso yeUSAID eZimbabwe ikhuthaza ukuthuthukiswa kwemisebenzi yokutholisa insane ezileminyaka engaphansi kwemibili ukudla okwakha umzimba njengendlela engenqabela ukulahlekelwa yimpilo kunye lokwengezelela amathuba okuthuthuka kwelizwe.
Ingcwethi kwezokudla okwakha umzimba engumcebisi wenhlanganiso ye USAID umnumzana Themba Nduna utshele umhlangano lozulu emahofisini obudlelwano phakathi kwehofisi yommeli weMelika eZimbabwe lozulu eHarare ukuba udubo lwendlala luyaqhela elizweni ngoba solubulala insane ezifika kunkulungwane zingamatshumi amathathu lanhlanu-35 500 ngomnyaka.
Inhlolisiso yogatsha lwezempilakahle ka 2009 iveza ukuba lumumo uyisilinganiso esifika kumatshumi amane ekhulwini 40% sensane zemhlubulweni wesub-saharan Africa.
Umnumzana Alois Mushayapokuvaka ongene laye lumhlangano uthi kuqakathekile ukuba inhlanganiso zoncedo ziphathise labantu abahleli emadolobheni kuloludubo.
Uhulumende lenhlanganiso ezinje uthi zingaphathisa ikakhulu abantu abahleli emaphandleni ngokunikeza abantwana ukudla okwakha umzimba kanti labantu abahleli emadolobheni bebhekana lenkinga yinye yokusilela kokudla ngoba lemisebenzi ingekho okucina kuphazamisa insane ikakhulu emizini ehlala abanengi:
Unkosazana Audrey Ndhlovu laye ongene lumhlangano ofundela I counselling ekolitshini le Zimbabwe open University ZOU uthi kuqakathekile ukuba kube lokuxwayiswa kwabesifazane kudaba lokukhula kwensane ethi uzaphatheka kumsebenzi onjalo eZimbabwe.
Umnumzana Nduna uthi amazwe anikeza insane ukudla kangaka acina elondoloza imali engasetshenjiswa kweminye imisebenzi yentuthuko.Uthi inhlanganiso yakhe iphathisa kundawana ezitshiyeneyo emapandleli kuma feeding scheme njalo ukunikeza ulwazi kwabesifazane abazithweleyo ekondliweni kuhle kwabantwana kunye lokulima ingade ezilima ukudla okwakha umzimba njalo bekhuthaza ukuthuthukiswa kwabesifana kumathuba atshiyeneyo.
Uthi bafundisa abesifazane ukuba bemunyise okwesikhathi eside njalo bekhuthaza ohulumende ukuba behlanganisele udaba lokutholisa insane ukudla okulomsoco beqoqa inhlelo zabo zentuthuko yesizwe zikhathi zonke.