amalinks wokungena

Breaking News

Ivuka Eseganga iCovid-19 KweleBotswana Ithinta LabeZimbabwe Asebehlala Khona


Botswana's President Mokgweetsi Eric Keabatswe Masisi

EleBotswana liqhubeka libhekane lenani eliphezulu labantu abatholakala beleCovid-19. KulabeZimbabwe abahlala kulelolizwe asebelahlekelwe ngumphefumulo, ngesikhathi isimo singatshengisi ukubangcono.

Noma nje eleBotswana lisanda kuyekethise ezinye zeziqondiso zokuvikela umkhuhlane weCovid-19, isimo siqhubeka sisiba sibi ngamandla.

Umongameli Mokgweetsi Masisi ubike ukuba okufana lokuthengiswa kotshwala sekuzavunyelwa, kukanti ngasikhathi sinye, uthe amahola okuvimba ukuthi abantu behambe ebusuku, awe curfew, ase aseyekethisiwe.

Kodwa esanda kwethula umbiko lo, iqula leCovid-19 Task Force kweleBotswana, libike ukuthi ilizwe libone inombolo eziphezulu okwedlula ezinye, ezalabo ababanjwe belomkhuhlane weCovid-19.

Umsekeli kamgcinisihlalo walolugatsha, usikwicamfundo Mosepele Mosepele uthi inani labatholakale belomkhuhlane weCovid-19 lidlule inkulungwane ezimbili lamakhulu amathathu (2,356) ensukwini ezine kuphela.

“Siqhubeka sibona inani liqonga lalabo asebelahlekelwe ngumphefumulo ngenxa yeCovid. Lamuhla sebedlula amakhulu amathathu. Emalangeni asanda kudlula sibone inombolo eziphezulu okumangalisayo abantu befika 2,356.

Kulezinombolo, kulabeZimbabwe abambalwa abagula besezindlini kukanti abanye balahlekelwe ngumphefumulo.

Eyinye yenhlanganiso zabeZimbabwe kweleBotswana, eyeSibanye Cultural Society, ithi kulenani eliphezulu labantu bekhaya abagula, kumbe abalahlekelwe ngumphefumulo ngenxa yeCovid-19.

Isikhulumi seSibanye, umnunzana Mthokozisi Mpofu uthi bayazama ukuphathisa labo abatshiywe yizihlobo.

“Isifiso lesi singenile lakithi, sesilahlekelwe ngabantu abambalwa ngitsho lakunhlanganiso yethu. Silendlela esincedisa ngayo ngezimali uma omunye wethu esesitshiyile.”

Uqhubeka ethi noma nje umkhuhlane usubhahile kuqakathekile ukuthi abantu baqhubeke belandela iziqondiso zabezempilakahle.

“Okuqakathekileyo yikuthi siqhubeke sigqoka ama mask, kanye lokulandela imfanelo esizifundiswa ngabe mpilakahle. Njalo kumele siyelule imizimba ukuthi siqinise amasotsha omzimba.”

Omunye oweZimbabwe osebenza kwesinye isibhedlela esikhulu eGaborone engu mongikazi kodwa engafisanga ukuqanjwa ngegama, uthi isimo sibi. Uthi kulabanye babo ababhubhileyo kukanti abanye bakuphiko lweIntensive Care Unit, iICU, bephakathi kobuhlungu.

EleBotswana lingamanye amazwe alokhu elinde ijekiseni yeCovid-19, yona umongameli Masisi othi izafika ekupheleni kukaMbimbitho.

UMasisi uthi wonke umuntu okufanelwe ahlatshwe uzathola ijekiseni, kodwa kuzalandelwa imithetho ngaphansi kwesisekelo sombuso.

EleBotswana selibone abadlula inkulungwane ezingamatshumi amathathu (30,727) betholakala belomkhuhlane weCovid-19, kukanti abangamakhulu adlula amathathu (332) balahlekelwa ngumphefumulo.

Facebook Forum

XS
SM
MD
LG