amalinks wokungena

Breaking News

Izakhamizi zakoBulawayo Zikhala Ngokukhuphuka Komthelo Kagetsi.


Zimbabwe Power Station.

Izakhamizi zedolobho lakoBulawayo zidla amahabula ngokukhuphulwa okwenziwe umthelo wamandla kagetsi ngabenkampani yeZesa bethi sebephila nzima ngokubasa umlilo ngoba iholo labo lingasahambelani lenguquko eba khona emthelweni wamandla kagetsi nyangazonke.

Phezu kokukhuphulwa komthelo wamandla kagetsi abantu bakhala ngokuthi bavele bephila nzima ngoba intengo yempahla yonke yokusebenzisa layo iqhubeka iqansa mahlayana ngasikhathi sinye iholo labo liqhubeka lincipha nxa liqathaniswa lendleko okumele zibhadalelwe ngenyanga njengemuli.

UNkosikazi Nomuhle Nhliziyo isakhamuzi sakoBulawayo, ngomunye wabakhala ngokukhuphulwa komthelo wamandla kagetsi.

“Lokhu okukuqansa kwagesti kusiphatha nzima iholo aliqansanga sibhekane lobunzima uhulumende ngabe uyasizwela sigcine intandane siyehluleka ukutheka ukudla pho eyamagesti siyayithathaphi lokhu kunzima sibili.”

UNkosikazi Nomqele Jubane, ngesinye njalo isakhamuzi sakoBulawayo esikhala ngodubo lunye.

“Indaba yokukhwela kwamagesti yasihlukumeza kunje sipheka ngomlilo asazi ukuthi sophilanjani. Imisebenzi ayikho kunzima elizweni, imiholo ayikhuphuki. Okokuqala sihlal emnyameni ngoba avele esidulela asisazi ukuthi siyophila njani.”

Isiphathamandla senhlanganiso ebona ngamalungelo abathengi eyeNational Consumer Rights Association, uMnu Effie Ncube uthi lokhu kuzabangela ukukhuphuka kwentengo yento yonke edingakala empilweni.

“Ukukhwela kwentengo yamandla kagesti kuzakwenza ukuba yonke into eyenziwa ngamandla kagesti iqanse. Impuphu, itshukela, amahlamvu lesepa kuzaqansa kudule kwenze impilo ibenzima ebantwini abavele bebuswa nzima. Impilo izakuya ibenzima ngamandla kunsuku ezilandelayo begalule ebuyangeni abaqale ukubhekana labo ngomnyaka ka1980.”

Embikweni owethulwe ngabeZimbabwe Electricity Distribution Company bathi linkampani kayephulanga lungelo labathengi ngokukhweza umthelo ngoba ilandela isivumelwano eyasenza lohulumende ngomnyaka odluleyo sokukhuphula amandla kagetsi ngezigaba.

Amandla kagetsi angaba yisilinganiso sakuqala se50Units asezabiza amatshumi ayedlula isificaminwe mibili-$86.39, kuthi isilinganiso sesibili se50units azabiza ikhulu lamadola lamatshumi ayisikhombisa $173.31. lsilinganiso se100 units sakuqala sizabiza amakhulu ayisithupha $606-38 kuthi isilinganiso sesibili se100 units sizabiza amakhulu edlula ayisifica minwe mibili $866-02.

Le yintengo uzulu athi ikhuphuke ngesilinganiso esikhulu kakhulu njalo esingeneliswa ngabanengi ngakhoke abantu bazabanjwa ngamandla ukuhlala bengela ugetsi okwesikhathi eside njalo besebenzisa inkuni, lakho okulakho ingozi yokonakala kwemvelo izihlahla sezitshabalala.

Udaba lokukhwezwa komthelo kagetsi siluphiwa nguAnnahstacia Ndlovu
please wait

No media source currently available

0:00 0:03:53 0:00

Facebook Forum

XS
SM
MD
LG