amalinks wokungena

Breaking News

Izakhamizi zakoBulawayo Zithi Uhulumende Kahlolisise Indleko Yezibhedlela


Mpilo hospital
Izakhamizi zakoBulawayo zikhala ngokuthi ugatsha lwezempilakahle lokondliwa kwabantwana kumele lumise ukuthathelwa kwezigulane ezilezikwelede ezibhedlela impahla ngoba lokhu kutsho ukuthi ukwelatshwa lokuthola impilakahle sokuzakuba lilungelo labalemali kuphela .

Inhlanganiso yezakhamizi, iBulawayo Progressive Residents Association isibhalele ugatsha lolu incwadi ukuthi kumiswe lolu hlelo lokuthatha impahla zalabo abalezikwelede zokwelatshwa ngoba uzulu evele engelayo imali yokuhlawula.
Inhlanganiso le ithi ukuthola impilakahle kanye lokwelatshwa ezibhedlela zikahulumende lilungelo laso sonke isizalwane sakuleli esimunyethwe lakusisekelo sombuso.

Lokhu kulandela ukuthi abadinga izikwelede iWellcash Debt Collectors eqhatshwe yisibhedlela seMpilo koBulawayo, sebeqalise umsebenzi wokuthatha impahla zabantu abalezikwelede ukuze zithengiswe kutholakale limali.
Nxa sokufakwe lembadalo yalinkampani, izikwelede lezi zibikwa zizacina sezikhwelile phose okuphindwe kabili okwenza kubenzima ukuthi abantu bazihlawule.

UNkosikazi Regina Khupe,oyisakhamuzi, uthi welatshwa ekupheleni komnyaka nyakenye kodwa kasahlawulanga ngoba engelamali. Uthi wahlala esibhedlela okwamalanga waba lesikwelede esingaphezu kwamakhulu amabili – i$228 kodwa laba abezikwelede bathi sokumele ahlawule imali ephezu kwamakhulu amathathu amadola – i$342 angayenelisiyo.

Uthi akakwazi ukuthi iyozala nkomoni nxa esethathelwa yonaleyo impahla engatsho lutho alayo endlini ngoba uyasala ebambe ize okutsho ukuthi sokumele kugule abantu abalemali zabo kuphela.

Umnumzana Zibusiso Dube owenhlanganiso yeBPRA uthi udaba lokuthathela izakhamizi impahla luyakhathaza ikakhulu nxa limpahla ithathwa ngemva kokuthi umuntu ethole usizo esibhedlela sikahulumende.

Uthi impilakahle lilungelo likazulu elivikelwa yisisekelo sombuso welizwe okutsho ukuthi kumele kudingwe ezinye indlela zokuphathisa izibhedlela ezingagoqeli ukuthathela izakhamizi impahla.

Wengeze esithi inengi lezizalwane lezi ezithathelwa impahla ngabantu abangelalutho okugoqela abafelokazi, asebegugile kanye lemizi engelabazali okufana nje lokugadla intwala ngewisa.

Ukhansila kaWard 23 koBulawayo, uMnumzana Thobani Ncube, uthi izibhedlela lezi zicabanga ukuthi abantu bekela ngabomo nje ukubhadala bakhohlwe ukuthi kubangelwa yikuswela. Uthi inengi labantu alisebenzi kungakho alila amamedical aid njalo lona elomkhuhlane alitsheli ngoba vele okukhulu akulamkhosi. Uthi liqiniso ukuthi izibhedlela zidinga imali yokuthenga imithi lokulungisa imitshina kodwa lo ngumsebenzi kahulumende hatshi izizalwane.

Umqondisi wezempilakahle esibhedlela seMpilo uDokotela Wedu Ndebele uthi isibhedlela sidinga imali yokuthi sisebenze njalo abaphonguthumela abadinga izikwelede bengaqalanga bazama ukukhulumisana lalowo olesikwelede.
Uthi uhlupho yikuthi inengi labantu liyabaleka kukanti kungcono ukuthi olesikwelede abuye esibhedlela akhulumisane labo baphathisane ukuthi angabhadala njani kancane kancane. Uthi ukubaleka yikho okubangela ukuthi kuthunywe inkampani le okucina kulenhlawulo ephezulu.

Ugatsha lwezempilakahle lokondliwa kwabantwana luthi izibhedlela zikahulumende kuleli azilamali yokuqhuba umsebenzi ngoba imali ingaphumi kuhle esikhwameni sikahulumende. Isibhedlela seUnited Bulawayo Hospitals sathola imali engaphezu nje kwesigidi lengxenye samadola – i$1.5 million yona idinga ukubhadala labo ebakweledayo imali ephezu kwezigidi ezimbili lengxenye - $2.6 million.

Inhlanganiso yezakhamizi iBulawayo United Residents Association yona isiqalise umkhankaso wokuhamba icela idola nje kuzakhamizi zonke zakoBulawayo ukuze kutholwe imali engamadola angamakhulu amabili enkulungwane -$200 000 ukuphathisa isibhedlela seMpilo.
XS
SM
MD
LG