amalinks wokungena

Breaking News

Izakhamizi ZakoBulawayo Zizondiswa Yikukhwezelwa Umthelo nguManisiphala Engakhulumisananga Lazo


Idolobho lakoBulawayo

Izakhamizi zakoBulawayo zithi kazemukeli isilinganiso sokwengezelelwa kwemithelo emsebenzini kamanisipala, ngemva kokuzwa ukuba lokhu kuvunyelenwe emhlanganweni owenziwe ngokhansila labaqondisi ababona ngezemali ukukhuphula imithelo ngesilinganiso sokungamatshumi amane lambili ekhulwini-42%, kungavunyelanwanga lezakhamizi.

Ngesikhathi lapho abantu beZimbabwe jikelele, bebhekane lenhlupho zokukhuphuka kwentengo zempahla lokudla ezitolo, ikhansili yakoBulawayo ibikwa yenze umhlangano wokukhuphula imbadalo yamanzi ingakhulumisananga lezakhamizi.

Uzulu wakoBulawayo uveze ukuthukuthela ngalokhu engelawo amahle. Unobhala weBulawayo Progressive Residents Association uMnumzana Thembelani Dube uthi kuqakathekile ukuthi abekhansili baxoxisane lezakhamizi andubana baphume lezinqumo ezephula amalungelo abantu.

“Thina njengenhlanganiso yako Bulawayo ekhangele izakhamizi sizwa silokungahlaliseki kakhulu ngodaba lolu ukuthi iCity Council ifuna ukukhweza amaRates. Ekuqaliseni ibifake i100% kodwa itshele abantu ukuthi yi56%, khathesi sebesithi 42%. Lathi siyakubona ukuthi izinto ziyakhwela kodwa okuqakathekileyo yikuthi kumele icity Council ixoxisane labantu kube lokuvumelana.”

UDube uqhubeke ethi lokhu yikwephula ilungelo labantu.

“Lokho ke njengenhlanganiso yeBulawayo Progressive Residents Association sibona engani lokhu yikwephula ilungelo labantu ngoba kulomthetho othi kumele kube lokuxoxisana. Thina ke lokho yikho esingeke sikuvume njengenhlanganiso ngoba izakhamizi yizo ezibhadalayo”

Abenhlanganiso ebona ngokulondolozwa kwamalungelo abathengi, eyeNational Consumer Rights Association (NACORA) bathi ikhansili kayiqale ihluzisise ezinye indleko zayo ezingelamsebenzi ingakhuphuli imithelo ngoba abantu bevele bethwele nzima lapha abakhona. Lokhu kuchasiswa ngumnumzana Effort Ncube umcebisi weNACORA.

“Thina njengenhlanganiso asivumelani lakho ukuthi ikhansili ikhweze imbadalo yamaRates amanzi lakho konkwe okwekhansili. Sithi thina ayiqume konke okungelancedo hayi ukuthi ibuye izothwalisa abantu nzima. Abaphungule izinto ezingelancedo besebenzise imali ekhona kulokhu okuqakathekileyo.”

Umnumzana Japhet Ndlovu ongumhlali wakoBulawayo uthi abali ukuthi ikhwezwe imithelo kodwa ngabe phela ikhwezwe ngesilinganiso esinganeno hatshi lesi esamatshumi edlula amane ekhulwini.

“Amanzi la abafuna ukuwakhweza bathi thina imali siyayithatha nga? Into vele zinzima into yonke ikhwelile, asali ukuthi bekhweze kodwa abakhweze ngeFive percent kumbe nge10 percent, hatshi 42%. Sebesibulala phela futhi njengeGovernment yonaleyi engasizweliyo. Khathesi lamazi bathi bayasikhwezela. I government ithi ibaphile amanzi kodwa lokhu akusayenzi.”

Izakhamizi zithi lapha ikhansili itshaya inja ifihle umphini ngoba ayifuni kuthi izakhamizi ziphatheke kuloluhlelo njalo isisenza izinqumo iyodwa. Ukukhutshulwa kwalimbadalo kutsho ukuthi izikhwama zikazulu zizaphanga ziphele kodwa kungakhanyi okuguqukayo.

Umansipala wakoBulawayo wethule umbiko ovele kumgcinisihlalo wekhomithi ebona ngezemali umnumzana Silas Chigora ethi isinqumo sokukhweza imithelo sibangelwa yikuqonga kwentengo yemphahla okugoqela amafutha ezimotha kanye lemithi yokuhlambulula amanzi esithengwa ngedola leMelika.

Udaba lwemithelo yakoBulawayo siluphiwa nguBathabile Masuku
please wait

No media source currently available

0:00 0:04:38 0:00

Facebook Forum

XS
SM
MD
LG