Izakhamizi zeNtolo eDoyana eMzingwane eZansi yemaNdebeleni seziveze ukukhathazeka ngomtshina wokugiga igolide iStamp Mill owakhelwe eduzane lemizi, zithi zesabela ukuthi kulakho ukuphazamisa impilakahle yazo kanye leyezifuyo.
Izakhamizi zithi kungabayingozi enkulu nxa imithi efana le mercury esetshenziswa lapho kubanjwa igolide ilakho ukugelezela edamu leNexen okuyilo abalithembileyo esigabeni seNtolo.
Eminye imizi ingumango ongaba ngaphansi kwekhilomitha elilodwa kusukela kulumtshina.
UNkosikazi Leaflet Ndlovu uthi izifuyo zabo zilakho ukutshabalala.
UMnu. Themba Nyoni esinye isakhamuzi seNtolo njalo ophila ngokwemba igolide uthi umtshina lo uqakathekile emsebenzini wabo kodwa usendaweni engafanelanga.
Ukhansila kaWard 4 uMnu. Jethro Moyo uthi udaba lwestampa lufikile endlebeni zakhe.
Imbiko esiyitholileyo iveza ukuthi lesistampa kasakhiwanga ngokusemthethweni ngoba singabhaliswanga kugatsha olubona ngokunakekelwa kwezemvelo olweEnvironmental Management Agency.
Imizamo yokuxoxa lomnikazi westampa iyehlule njalo izakhamizi zithi kazikwazi ukuthi ngowangaphi.
Imithetho yezokwenjiwa kwamatshe aligugu kuleli inikeza amandla amakhulu kulabo abembayo osekudala ukuthi kubelengxabano phakathi kwezakhamizi labembayo phambilini.
Kusenjalo, abesifazana abesigabeni seSibambene kuWard 4 eMzingwane sebesungule uhlelo lokugaya ukudla kwezifuyo abakuthengisayo ukuze baziphilise lemuli zabo.
UNkosikazi Thembi Mlilo olilunga leVusanani Feeds uthi basebenzisa izihlahla zeganga ukugaya lokhu ukudla.
Kunanzwe ilanga lamalungelo abesifazana kuyonale iviki, kulenkuthazo yokuthi basukumele phezulu ukuze bathole amathuba alinganayo ngalesisikhathi kulegcikwane leCoronavirus.
