amalinks wokungena

Breaking News

Izakhamizi zeHwange Zamukela Uhlelo lweGatshompo


Uhlelo lweGatshompo

Izakhamizi zeHwange eMatabeleland North zamukela ngemibono ehlukeneyo uhlelo lokulima olubizwa ngokuthi Intwasa kumbe Gatshompo.

Abanye sebeqalile ukuthola uncedo lwenhlanyelo lomvundiso lapho uMongameli Emmerson Mnangagwa achaze khona ukuba imuli ezifika phose izigidi ezimbili i1.8 million, zizasizakala phansi kwalolu hlelo emizameni yokumelana lokuguquka komumo womkhathi ngoba ilizwe selivame ukungatholi izulu eleneleyo uma kuqathaniswa leminyaka edluleyo.

Inengi lezakhamizi zeHwange sebaqeda ukugebha amagodi kaGatshompo kulabanye abalokhe bephakathi kwalumsebenzi. Kube labanye asebetholile uncedo lwenhlanyelo lomvundiso kuhulumende phansi kohlelo lweIntwasa lokulimela umnyaka ka2020 kusiya ku2021.

Isakhamuzi seMabale, uMnu Mathias Ncube uthi uyalwamukela uhlelo kodwa kalamandla okulima ngenxa yendlala.

“Uhlelo lukagajompo siyalwamukela kodwa siswela Amandla okulwenza kodwa angilamandla ngiphelelwa ngamandla ngoba ngilendlala.Elizweni kulendlala enkulu uma ukhuluma lami kanje ungibuza ngikhangelele ukuthi ungiphe ulutho olunganginceda lami ngingene kuhlelo lukagajompo ngiqinile”

UMnu Raphael Hadebe esinye njalo isakhamuzi seDete, ngomunye osalinde umvundiso lenhlanyelo.

“Ngiyalwamukela angilwamukeli ngoba imota ihamba ngepetrol uma ihamba ngepetrol iyafika ngoba iyabe isithu ngakho lami uma ngitshaya uGatshompo kuvuze ukuba ngibe ngisuthi. Okwamanje sesiwatshayile amagodi kodwa asikayitholi inhlanyelo lomvundiso siyimelele.”

UKhansila kaWard 16 eLupote eHwange uMnu Cosmas Mwakiposa uthi sebeyitholile inhlanyelo.

“UHlelo lukaGatshompo luhamba kahle inhlanyelo lomvundiso sesikutholile besilokhe sifundiswa ngalo njalo siyaluthakazelela kakhulu ngoba luyagcina amanzi emagodini.”

Ekhuluma embikweni wakhe oqakathekileyo oweState Of the Nation Address, ngeviki edluleyo, uMongameli Emmerson Mnangagwa uchaze ukuba izakhamizi eziyizigidi lasificaminwe mibili, 1.8 million bazatholiswa inhlanyelo lomvundiso phansi kohlelo lweIntwasa lokulima amagodi okudume ngokuthi nguGatshompo ukuze izwe liphume endlaleni kulandela ukungani kuhle kwezulu eminyakeni emibili emithathu edluleyo.

Izakhamizi ezinengi eHwange sezitshayile amagodi, kuthi abanye lokhe bewatshaya njalo abanye sebeyitholile inhlanyelo lomvundiso.

Facebook Forum

XS
SM
MD
LG