amalinks wokungena

Breaking News

Izakhamizi Zethesa iZanu PF Umlandu Wokuthenga Amavoti Ngokudla


Emaphandleni.

Loba nje umumo wezombusazwe emaphandleni eZansi yemaNdebeleni uthulisile abamabandla aphikisayo basola ibandla elibusayo ngokuthenga uzulu ngokudla kanye lokubathembisa ukubapha ukudla.

UZulu kanye labamabandla ezombusazwe uyavumelana ukuthi akukabi lodlakela oluphathelane lezombusazwe njalo kuthule kulalapho kusabusa owayenguMongameli uMnu. Robert Mugabe.

UMnu. Mkhulumeli Moyo oweBezha eMzingwane uthi kutshaya umoya kulezinsuku ukwedlula ngesikhathi sikaMugabe.

“As far as I am concerned lapha mina angikaboni ubudlwangudlwangu ngibona its better far much different kuleminyaka leyi eyedlulileyo ngoba ubungakhululekanga kathesi sizizwa sikhululekile,” kutsho uMoyo.

Loba nje kungela dlakela lezombusazwe abamabandla aphikisayo bathi inyathelo likaMongameli Emmerson Mnangagwa lokupha uzulu inkomo phansi kohlelo lweCommand Livestock sekudale ukuthi iZanu PF ikhankase ithembisa uzulu inkomo.

UNkosazana Sukoluhle Nleya owePlumtree ngomunye walabo abathola lezinkomo phansi kwaloluhlelo.

“So ibizo lami yilo lodwa elaphumayo kuWard 20 eDombodemba under Plumtree ngiyabonga ngokunikwa lezi nkomo ngoba lezi nkomo zizangithuthukiswa lemuli yami ingasweli imfundo kukho konke seethe ngakunikwa ngizaqhubeka ngisenza kahle,” kutsho uNleya.

Kubelokukhonona okukhulu ngendlela lezinkomo ezabiwe ngayo inengi lisithi ziphiwe abasekeli bebandla leZanu PF. UMnu. Reason Moyo uthi akula ngistho loyedwa amaziyo othole lezinkomo emhlubulweni weZansi yeGwanda.

“Okunje ngalapha esigabeni sakithi eGwanda South constituency angibonanga loyedwa oyitholileyo leyonkomo so kusuka kungimangaze futhi ukuthi bonalabo abantu abaphiwe inkomo eGwanda bavele bengabantu beGwanda yini asibaboni phela abakithi abaziphiweyo lezonkomo,” kutsho uMoyo.

Imbiko esiyitholileyo iveza ukuthi emaphandleni eGwanda izakhamizi sezithenjiswe inkomo ezintathu ngomuzi ngabakhankasela ibandla leZanu PF njalo isikhulumeli sebandla leMDC T ekhokhelwa nguMnu. Nelson Chamisa eZansi yemaNdebeleni uMnu Ekem Moyo ozancintisa kukhetho lwabameli bedale lephalamende eGwanda South uthi lokhu kudala ukuthi izakhamizi zesabe ukubuya emhlanganweni yebandla lakhe.

“Kathesi bayahamba besithi bazanika abantu inkomo kuyindlela yokuthi wena ozabonakala usiya emhlanganweni wamabandla aphikisayo lezonkomo awusoze uzithole, sikhankasa emumweni onzima abantu bajikisana lendlala ukuthi sizancitshwa lokhu,” kutsho uMoyo.

UNkosazana Anele Mnyandu owebandla le People’s Rainbow Coalition ozancintisa kukhetho lwabameli bedale lephalamende eMzingwane uthi amalunga labasekeli bebandla lakhe kabasaluphiwa uncedo lokudla okuvela kuhulumende besetheswa umlandu wokusekela amabandla aphikisayo.

“Kunje eMzingwane ukhansila wePRC kastholi ukudla kukahulumende abazange bakufihle laba abapha ukudla abeZanu PF ukuthi benze irally bamemezele batshele abantu bonke ukuthi yonke umuntu owe opposition kungabe kuyi MDC kungabe kuyiPRC yonke umuntu weopposition baqanjwa ngamagama ukuthi abasoze banikwe ukudla,” kutsho uMnyandu.

UMnu. Kudakwashe Zulu ozancintisa kukhetho lwabameli bedale lephalamende eMatobo North emele ibandla leAlliance for the People’s Agenda uthi ababengabalweli benkululeko abavumi ukuthi bakhankase emapulazini aseMatojeni.

Kutsho uZulu: “Nxa uhamba endaweni ezinje ngemapulazini bahle bakutshela ama war vet ukuthi lapha asikufuni la thina sifuna abantu beZanu PF kuphela so besengimangala ukuthi kanti amapulazi ngawabantu beZanu PF bodwa, amaposter ami bayawadabula ngiyadinga ngiswele ukuthi bawadabulelani njengoba umthetho usithi akumelanga kudatshulwe.

UTshalimani webandla leZanu PF eZansi yemaNdebeleni uMnu. Rabelani Choeni kathandanga ukuxoxa ngaloludaba.

Ukukhonona kwabamabandla aphikisayo lokhu kuza ngesikhathi uMongameli Emmerson Mnangagwa ephethe ethembisa umhlaba wonke jikelele ukuthi eleZimbabwe lizaqhuba ukhetho oluqhotho , olungelakuthandabuza njalo olulokuthula.

please wait

No media source currently available

0:00 0:04:46 0:00

Facebook Forum

XS
SM
MD
LG