amalinks wokungena

Breaking News

Jonathan Moyo: Asisafuni iZBC Ibe Yiyo Ethatha Imali YamaLicence


ZBC
Ugatsha lokwethulwa kwembiko lemisakazo luthi soludinga indlela zokuthuthukisa ukubuthaniswa kwemali yamalicence ukuze ususwe ezandleni zomsakazo we Zimbabwe Broadcasting Corporation unikwe uhlangothi olutsha oluzakhangela ukuthi limali isetshenziswa ukuhlelwa kwenhlelo ezizajabulisa abalaleli lababukeli kulandela ukukhonona kukazulu ukuthi ithelevizhini yalumsakazo ayibukelwa ngenxa yenhlelo ezingela hlonzi.

Ekhuluma ekolitshini le National University of Science and Technology ngoLwesihlanu ekuseni, umphathintambo walolugatsha uSikhwicamfundo Jonathan Moyo, uthi ukucubungula abakwenzileyo kuveza ukuthi umsakazo weZBC usebenzisa imali yamalicence ukuzenzela ekuthandayo okungalani lokuthuthukisa inhlelo okuyiwo umlandu wemali le.

Uthi sebexoxisana njengogatsha ukuthi limali ingaphathwa yi ZBC kodwa kubelohlangothi oluzaphatha limali luyihambise kunhlelo zokuthokozisa uzulu ngenxa yokuthi inengi kuzulu lithi alibhadali linhlawulo ngoba vele alibukeli lumsakazo.

Wengeze ethi bayacubungula imisebenzi yomsakazo lo osokulobufakazi bokuthi ubungaphathwanga ngendlela njalo labo akade bengaqhubi kuhle umsebenzi bazasuswa kungelani lokuthi imbali yabo ithini kumbe bebedlelana lobani izolo.

UMoyo uqhubeke esithi sesifikile isikhathi sokuthi uhulumende asebenzelane labamaphephandaba lemisakazo kungelansolo lokuxabana kungakho sebesebangeni eliphezulu ukuthi kubelogwalo oluzakutsho ukuthi intathelizindaba zisebenza njani ukuze kukhitshwe imithetho evumela amapholisa ukubabopha nxa bengaqhubanga kuhle ngoba lo asumsebenzi wamapholisa.

Uthi kungumlandu kahulumende ukuphatha kuhle izizalwane, alandele umthetho hatshi okweminyaka edluleyo abantu abayabe bebanga ukusetshenziswa kwemithetho kungathi ivela kwamanye amazwe.

Umnumzana Godfrey Mathuthu, ongene lumhlangano, uthi zindaba ezimnandi ukuthi uhulumende udinga ukutshiya abezindaba ukuthi bazinuke bodwa amakhwapha ngoba bebesebenzisa ingxabano ekhona lohulumende kumbe ubudlelwano abalabo lohulumende ukuqhuba umsebenzi ngendlela engaqondanga.

Uthi ukhangelele ukuthi amaphephandaba lemisakazo kuqale ukwenza umsebenzi ngemfanelo kungatshengiseli ukuthi kusekela liphi ibandla lezombusazwe.

Inkulumo yalamhla e NUST yingxenye yohlelo lwalikolitshi lokuletha abantu abaqakathekileyo ukuzakhulumisana lozulu – ama-Guest Lectures ngaphansi kwenhlelo zokuthakazelela iminyaka engamatshumi amabili ekolitshi leli.
XS
SM
MD
LG