amalinks wokungena

Breaking News

IZEC Ihlangana Labafuna Ukuncintisa Kukhetho


Abazancintisa Kukhetho

Ikhomishini ebona ngezokhetho eye Zimbabwe Electoral Commission-ZEC, ihlangane lamalunga amabandla wonke akoBulawayo akhangelele ukuncitnisa kukhetho lwalonyaka, esikolo seMilton Junior ngoLwesibili bebonisana ngengwalo ezidingakalayo mhla zilitshumi lane kuyonale inyanga, edale lokubhalisa eleNomination Court elizahlala eTradgold kuCourt 5.

Amalunga amabandla akhangelele ukuma kukhetho lwalonyaka ngoLwesibili athole imfundiso esuka kwabe ZEC mayelana lengwalo ezidingakala ukubhalisa edale leNomination Court okumele bazise emawofisini abo akoBulawayo.

Obona ngezokuqhutshwa kohlelo lolu koBulawayo, uNkosikazi Sithembiso Khuphe uthi lo ngumhlangano wabo wakuqala lamalunga amabandla ezombusazwe ojonge ukubabonisa ngokumele bakwenze kusase lesikhathi ngoba lonyaka amabandla akhangelele ukuma kukhetho manengi.

“Lo ngumhlangano wethu wakuqala lamalunga amabandla akhangelele ukuma kukhetho oluzayo sijonge ukuthi mhla weNomination Court kungabi labantu abazakwehluleka ukuletha imfanelo ezeneleyo ngoba manengi amabandla asethe asazisa ukuba azaphatheka kukhetho,” kutsho uKhuphe.

Usikomitshi weZEC, uMnunzana Daniel Chigaru uveze ukujabula ngenani labantu abangene lumhlangano ethi uqhutshwe kuhle njalo uyethemba amabandla azalungiselela iNomination Court ngendlela.

“Umhlanango wethu siwuqhube kuhle ngiyajabula ukuba yonke imibiko eqakathekileyo bayitholile bonke abakhangelele ukuma kukhetho oluzayo. Mhla weNomination Court sizavumela labo ababhadalayo ukuba basebenzise imali yebulenjini kanye lezinye imali ezisebenza kuleli,” kutsho uChigaru.

UNkosikazi Charity Mpofu okhangelele ukuba lilunga ledale lephalamende emele iZAPU eNkulumane uthi uhlelo lolu luyabukeka.

“Ngibona iZEC isenzele kuhle ukuba sihle siqalele ukulunisa ingwalo zeNomination Court, sizise ngesikhathi ukuze mhla welanga konke kube sekuhlelekile,” kutsho uMpofu.

UNkosikazi Nomvula Mguni okhangelele ukumela ibandla leMDC-T ekhokhelwa nguNkosazana Thokozani Khuphe eBulawayo East uncome uhlelo lweZEC.

“Uhlelo lweZEC lokuthi sihle siqalele ukulungiselela ilanga leNomination Court luyabukeka noba ngalelo langa asiyikuba lokuxokozela njalo nokubona kwami amaluniselelo okhetho aqhubekakahle ezweni,” kutsho uMguni.

Ilunga leZANU PF elikhangelele ukuncintisa ukuba lilunga ledale elimela iNketa-Mganwini, uMnunzna Elphas Mashaba uthi ufunde okunengi emhlanganweni wanamhlanje.

“IZEC isifundise okunengi ngamalungiselelo eNomination Court kanye lokuthi siziphathe njani njalo ngendlela abaqhuba nakhona nibona kuzahleleka uma siqathanisa lokwenzakala nomnyaka ka2013,” kutsho uMashaba.

Amabandla wonke akhangelele ukungena kukhetho lonyaka ajabulele uhlelo lweZEC kanye lengcazelo yokumele kwenziwe ukuze bengehluleki ukungena ekhwethweni. Abadinga ukuncintisa lonyaka bakhuthazwe ukuya emawofisini aweZEC koBulawayo bayeboniswa ngakho konke okuqondileyo okumele bakwenze.

Labo abakhangelele ukuba ngamakhansila abahlawuli lutho,kuthi amalunga edale lephalamende ahlawula amatshumi amahlanu amadola kuthi abafuna ukuncintisa esikhundleni sikamongameli bahlawula inkulungwane eyodwa yamadollar njalo amaphepha abo eNomination alungiselwa eHarare emawofisini eZEC hatshi koBulawayo.

IZEC ichaze ukuba ngesikhathi amabandla aletha amabizo azabamela eSenate kanye lamalunga eproportional representation kumele bahlawule ikhulu lamadola.

Kusukela ngoMvulo iZEC iqale ukupha amabandla lamalunga abo amaphepha okumele bawagcwalise bawabuyisele eZEC idale leNomination Court lingakahlali kumbe ngelanga lihlala.

please wait

No media source currently available

0:00 0:04:51 0:00

Facebook Forum

XS
SM
MD
LG