Izifundi ezikunhlanganiso yeZimbabwe National Students Union (ZINASU), zitshengisele emigwaqweni eHarare ngoLwesihlanu zisola isimo esibi somnotho welizwe lesezombusazwe zisithi uhulumende kumele alungise udubo lwenkohlakalo.
Izifundi lezi zitshengisele endaweni ezigoqela esilindweni samabhasi lezimotha ezithwala uzulu esiya emalokitshini, eseCopa Cabana.
Lezi zifundi bezisola umumo wezombusazwe kanye lokonakala komnotho welizwe, ikakhulu udubo lwenkohlakalo oluselizweni zisithi nxa lungasalungisiswanga inkinga ezibhekane lelizwe kazisoze zaphela.
Unobhala weZINASU, uAbel Runga, uthi indubo ezihlangana labazali ziyabaphambanisa ezifundweni.
“Njengabazali yini elisihambisa ezikolo. Yini elibulala inkomo lenkukhu ukuthi siye ezikolo. Simi lapha njengezifundi sisithi thina hatshi elizweni lethu silendubo esihlangana lazo. Indubo esihlangana lazo asizozethu sodwa kodwa ngezikazulu ngoba imali esibhadalela esikolo ivela kini.”
Lokhu kugcizelelwe nguTadiwanashe Gwena, olilunga leZINASU osekolotshini leMidlands State University (MSU).
“Esesikwenzile yikuthi sizabe sisebenzisa indawo yeCOPA Cabana lapho esizabe sikhuluma labazali njengezifundi ze Zimbabwe.”
Kodwa omele abatsha kubandla leZANU PF engumsekeli obona ngezokuhanjiswa komsebenzi, uMnu. Mabutho Moyo, uthi izifundi zeZINASU zisetshenziswa ngabamabandla aphikisayo ukulwisa iZANU PF.
“IZINASU ngokuliqenjana kwabafana besikolo kabayenze into zesikolo betshiyana lento zombangazwe. IZANU PF ukwehluleka kwayo sizakubona ngo2023 abantu sebesithi kabasayifuni, okwakhathesi kabayiyekele iphutshe iminyaka emihlanu eyayiphiwa ngabantu. Labana ngabantwana besikolo abasetshenziswayo.”