Izifundi zithi amalungelo azo akusisekelo sombuso okufunda beveza leminqondo yabo bekhululekile ayatshaphazwa ngamakolitshi noma umthetho uvumeza ukuba izifundi zibe ngezifunda zikhululekile elizweni.
Umkhokheli wenhlanganiso yezifundi eye Zimbabwe National Students Union- ZINASU umnumzana Gilbert Mutubuki uthi izifundi ezifika kweziyisithupha zimiswe izifundo ekolitshini le University ye Zimbabwe lonyaka, ezilitshumi lambili zamiswa eNational University of Science and Technology- NUST, ezilitshumi lane zamiswa eMorgenster Teacher’s College kuloludaba okuyinto engamukelekiyo.
Umsekeli womkhokheli weStudent Representative Council ye University ye Zimbabwe, umnumzana Gift Ostillos Siziba uthi uhulumende kukhanya esesaba ukunikeza izifundi amalungelo azo.
Unobhala jikelele we ZINASU umnumzana Makomborero Haruzivishe uthi baphakathi komsebenzi wokufundisana lezifundi ukuba bazi ngamalungelo abo bekhuthaze uhulumende ukusekela lemisebenzi yezemfundo ku budget kunye lokuthi ama syllubus aguqulwe ngoba lezifundo abazifundayo sezizindala zingasahambelani lezikhathi.
Umnumzana Thomas Gamure oyisifundi eUniversity ye Zimbabwe uthi udaba lwezindlu ezihlala izifundi lalo lumele lulungisiswe.
USiziba uthi bona njengenhlanganiso emela izifundi izama ngamandla onke okuba loludaba lulungisiswe kugoqela lokuphathiswa kwezifundi eziswelayo kuleli kolitshi.
Ikolitshi le University ye Zimbabwe ilezindlu ezenela izifundi ezizinkulungwane ezintathu kuphela lona ikolitshi lilezifundi ezedlula inkulungwane ezilitshumi lantathu-13000, okutsho ukuthi inkulungwane ezilitshumi zisala zimele zizidingele indawo zokuhlala.
Sithole okhokhela leli kolitshi usikhwicamfundo Levi Nyagura engekho ehofisini ukuba sizwe icele lakhe kuloludaba.