amalinks wokungena

Breaking News

Izifundi eZimbabwe Zikhala Ngokuswela Imali Yokufunda Ebulenjini beInternet


Ubhubhane lweCovid-19 seluhlasele njalo okwesine eZimbabwe, abayithi yi4th wave, okwenza ukuba amakolitshi amanengi emfundo yaphezulu athathe izinqumo zokwenza izifundo ebulenjini beInternet kusenzelwa ukuvimba ukumemetheka kwegciwane leCoronavirus.

Izifundi ezinengi zithi kuzakuba nzima ukufunda ebulenjini njengoba bengele mitshina njalo lemali yokuhlawulela ukusebenzisa ubulembu beInternet.

UVigilent Shoko, ofunda eMidlands State University, uthi kuhle ukufunda ebulenjini kodwa kuyadula.

“Ukufunda online kuhle kakhulu ngoba kusivikela ekubambeni iCovid-19. Udubo yikuthi asilayo imali yokuthenga idata yokuba singene ebulenjini.”

USheron Khumalo, laye ofunda eMidlands State University, uthi ukufunda ebulenjini kulobuhle lobubi bakho.

“Ukufunda ebulenjini kuhle njalo kubi ngoba singabantu ngakho kuhle ukuba sivikeleke ekubambeni Covid-19 thina lababalisi ngoba impilo zethu ziqakathekile. Kubi ukufunda ebulenjini ngoba imali esizibhadala esikolo zokufunda ebulenjini abasiphi idata yakhona kucina kusidulela ukufunda ebulenjini.

Osakhulayo olilunga ledale lephalamende eBulawayo East, uNkosazana Melisa Chikambi, uthi ukufunda ebulenjini kuqakathekile ngoba kuzakwehlisa ukumemetheka kweCovid-19

Isakhamuzi sakoBulawayo, uNkosikazi Phumuzile Ndlovu, uthi kunzima ukuthola imali yokungena ebulenjini.

“ICovid-19 ihlasele impela njalo sesiphilanzima, ngilomntwana ofinda eNUST sekumele afunde online kodwa ke kunzima ukuthi sithole imali njalo ledata yakhona iyadula okulakho ukuphazamisa izifundo zabantwana.”

UMphathintambo wedolobho lakoBulawayo, uNkosikazi Judith Ncube, usekhuthaze uzulu ukuba ahlale eqaphele elandela iziqondiso zokuzivikela ekubambeni iCovid-19 ezethulwa ngabezempilakahle.

“Kuqakathekile ukuba abantu balandele iziqondiso zokuzivikela ekubambeni iCovid-19 baqgoke kuhle amamask, bengasondelelani njalo baqaphele abantu abethekelela emakhaya abao balakho ukubathelela iCovid-19.”

EZimbabwe kulabantu abahlolwa bafumanwa belecovid, abedlula ikhulu elilengxenye lenkulungwane-150 628, kwasila abedlula ikhulu lenkulungwane-129 095, kwabhubha abaphose bafike inkulungwane ezinhlanu-4 720 okwamanje kugula abedlula inkulungwane eziphose zibenhlanu-4 996.

Emizameni yokumelana lokumemetheka kwaleligcikwane uhulumende senelise ukuhlaba abantu abaphose bafike izigidi ezintathu 2,926 141 ngokugcweleyo kuthi abangakaqedisisi ukuhlaba sebephose bafike kuzigidi ezine -3 907 860.

Facebook Forum

XS
SM
MD
LG