amalinks wokungena

Breaking News

Izifundi Zikhuthaza Uhulumende weZimbabwe Ukuthathela iXenophobia Amanyathelo


Student Christian Movement of Zimbabwe

Izifundi zikhuthaza uhulumende weZimbabwe ukuba athathe amanyathelo okusola udlakela lwe Xenophobia ezansi yeAfrica aphinde avikele izifundi zelizweni ezifunda ezansi yeAfrica ngokwengezelelweyo kuthuba azalithola emhlanganweni we SADC ozakwenziwa kuliviki.

Umqondisi wenhlanganiso yezifundi eye Student Christian Movement of Zimbabwe uMnu. Douglas Tigere uthi kuyadanisa ukuba kulabantu abanengi kangaka be Zimbabwe abahlala eSouth Africa kodwa uhulumende ukhanya angelakho okunengi akwenzayo ethi ukhathele ngomumo wezifundi ze Zimbabwe kulelo lizwe lokuvikeleka kwazo.

Isifundi seBhindura University uNkosazana Luwiza Makosa oyisikhulumeli salinhlanganiso uthi besabela ikakhulu izifundi ezingamantombazane ngoba zibhekana lubunzima obengezelelweyo kugoqela ukudlengulwa khona kungela mikhankaso engako ekhuza lokhu.

Wengezelele esithi noma kunjalo abahlabeleli abafana lo paChihera kunye losopolitic uNkosazana Jessie Majome bayaphatheka kulumsebenzi wakhuthaza abatsha labesifazane ukuba besebenzise ubulembu be social media ukuthumezela imbiko yokusola udlakela lwe xenophobia.

Umqondisi we Arterial Art Zimbabwe uMnu. Mandla Ncube uthi abakumsebenzi wokulibazisa kuleli bathathela phezulu udaba lokukhuza imisebenzi emibi le eyokubulalana.

UTigere ukhuthaze uhulumende we Zimbabwe labohulumende bamanye amazwe akumkhono we SADC ukuba besebenzise ithuba lomhlangano we SADC ozenzelwa kuleli yinkokheli zamazwe ngolwesithathu ukukhuza ilizwe le zansi ye Africa kanzima lokulikhuthaza ukuba livikele wonke umuntu ohlala kulelo lizwe.

UNcube uthi enye indlela engaphathisa yikusebenzisa abenza imidlalo yokuzilibazisa ethi izinto ezifana lomculo lama drama kwamukelwa ngabantu kalula:

Udlakela lwe Xenophobia ezansi yeAfrica oluqhamuke kumaviki amabili asanda kwedlula lusolwe ngamazwe amanengi omhlaba ele Nigeria labiza ummeli walo eSouth Africa amazwe afana le Mozambique, Malawi le Zimbabwe athwala abantu bawo bebuyela ekhaya. Amanye njalo amazwe agoqela iBotswana, UK le Australia akhuthaza abantu bawo ukuba bengethekeleli ele South Africa umumo usanje.

XS
SM
MD
LG