amalinks wokungena

Breaking News

Izijeziso Ezetheswa AbeZanu PF Zilomthelela Omubi Na Kuzulu?


UMongameli Emmerson Mnangagwa esemkhosini wokukhankasela ukwesulwa kwezijeziso eNational Sports Stadium

Uhambo lwesithunywa seUnited Nations uNkosazana Alena Douhan, yena ofike eZimbabwe ngoMvulo elanda ukuyadingisisa ukuthi izijeziso zenotho ezetheswa amalunga eZanu PF yiMelika leBhilithani zilomthelela bani kuzulu makhaza solwehlukanise ingcwethi, osomabhizimusi kanye labezombusazwe ngemibono.

Ibandla leZanu PF lithi lanxa zafakelwa amalunga alo kanye lamankampani alobudlelwano lohulumende, izijeziso lezi yizo ezibulala umnotho njalo ziphazamisa uzulu.

“Kuhle ukuthi sitshelaneni iqiniso bakithi. Izijeziso lezi zilimaza uzulu,” kutsho usomabhizimusi olilunga leZanu PF uMnu Believe Gaule.

“Abantu baphila nzima, izinto azihlangani ngenxa yokuthi kenelisi ukuthi aboleke izimali kumabhanga amakhulu omhlaba ukuze athuthukise impilo zabantu.”

Kodwa usomabhizimusi olilunga leMDC Alliance uMnu Edwin Ndlovu uthi umnotho welizwe ubulawa ngombuso weZanu PF omubi.

“Izijeziso zetheswa amalunga eZanu PF lamankampani alobudlelwano lalelibandla asekela ubudlova. Ngokunjalo, lezizijeziso azilani lomnotho weZimbabwe, umnotho ubulawa yibusela obenziwa ngabantu beZanu PF,” kutsho uMnu Ndlovu.

Kusobala ukuthi osomabhizimusi abakumabandla ezombusazwe kababoni ngaso linye kuloludaba.

Ukuze siyixazulule lindaba, sixoxe lomunye njalo usomabhizimusi ozimeleyo uMnu Aleck Ndlovu, sambuza ukuthi elakhe ibhizimusi lingaba liphazanyiswa yizijeziso lezi na.

“Leyo msakazi singathi yindinabadli, nxa kuyingoma isidine abalaleli labagidi,” kutsho uMnu Ndlovu, oyisiphathamandla senhlanganiso yeBulawayo Vendors and Traders Association.

“Angeke ngithi ukungenzi kuhle kwebhizimusi lami kubangelwa ngama-sanctions. Kodwa ngumkhathi omubi wezomnotho obangelwa ngezombusazwe ezingamanga ngokuqonda.”

Khepha ingcwethi kwezenotho uMnu Reggie Shoko uthi akulakuthandabuza ukuthi izijeziso lezi zilomthelela omubi kumnotho welizwe.

“Nxa sikhangele umthetho weZIDERA uyanika iziphathamandla zeMelika amandla okuphikisa ukuthi iZimbabwe oboleke izimali,” kutsho uShoko. “Lokho kwenza iZimbabwe yehluleke ukuboleka imali yentuthuko kunhlanganiso ezifana laboIMF.”

IMelika leBhilithani zithi uhulumende weZanu PF kumele ekele ukwephula amalungalo oluntu ukuze izijeziso lezi zesulwe. Kodwa uGaule uthi akula kwephulwa kwamalungelo okukhona.

“Okokuthi kumele siguqule izenzo lokho akusebenze. Izijeziso lezi kumele zesulwe,” kutsho uGaule exoxa leStudio 7.

Kodwa uMnu Edwin Ndlovu yena uthe uhulumende weZimbabwe kumele aguqule izenzo zakhe ngokuhlonipha amalungelo ukuze umnotho uvuke lezijeziso zesulwe.

EleMelika lithi izijeziso lezi aziphazamisi uzulu makhaza nanku kulamankampani alelilizwe aqhuba amabhizimusi eZimbabwe afana leJohn Deer yona ethengisele iZimbabwe amathalakitha amanengi nyakenye.

Uhulumende weMelika uphakathi njalo komkkhankaso wokuxhumanisa amankampani elizwe lakhe laweZimbabwe angaba efuna ukuxhasana kwezamabhizimusi.

Inhlanganiso yeInternational Monetary Fund (IMF), yona eyayithe umnotho weZimbabwe uzakhula ngokuyisithupha ekhulwini lonyaka, i-6 percent, isisithi uzakhula ngokuhlanu kuphela, 5.1 percent.

please wait

No media source currently available

0:00 0:05:00 0:00

Facebook Forum

XS
SM
MD
LG