amalinks wokungena

Izulu eselilesikhathi lisina nsunku zonke eHarare leChitungwiza selidale umonakalo omkhulu latshiya izakhamizi zikhathele ngodubo lwempompoma zamanzi ageleza engena ezindlini.

Noma abantu besamukela ukuna kwezulu, ukukhithika kwalo phose nsuku zonke sokudala inkinga ezinengi ezilakho ukubangela ukuqhamuka kwemikhuhlane njengoba amanzi asegeleza ndawana yonke esehlangana laphuma lezambuzini lokumele aye empompini anathwa ngabantu.

UMnumzana Admire Zaya wenhlanganiso yezakhamizi eye Chitungwiza Progressive Residents’ Association uthi lelizulu seliphazamisa inhlalakahle yabantu.

Izakhamizi zeChitungwiza zithi ngaphandle kodubo lwamanzi angena lasezindlini abantwana babhekana lenkinga zokudlalela emigwaqweni egeleza amanzi ayabe ehlangene lengcekeza ngoba lemisebenzi wokubuthwa kwezibi ingasaqutshwa ngenfanelo.

UMnumzana Marvelous Khumalo, weyinye njalo inhlanganiso yezakhamizi eye Chitungwiza Residents’ Trust, uthi ngakwelinye icele leli zulu liphathisa abantu.

Osaphethe isikhundla sikamabhalani wedolobha le Harare, uNkosikazi Josephine Ncube, wethekelele imizi egoqela iMbare le Glen Norah lapho izakhamizi ezibhekana khona lodubo olufanayo ehlola imisebenzi yokulungisiswa kwemigelo yamanzi kusikhatshana esisanda kwedlula.

Izakhamizi ezinengi zikhala ngodubo lokuba amakhansili amelela isikhathi sezulu ukulungisa imigelo abeselwisana lodubo izulu selisina sokulomonakalo.

UKhumalo uthi kulendawo okumele zilungisiswe ngesiphangi phangi.

Indawo ezilenkinga enkulu zigoqela iZengeza 4 eGomba, Zengeza 3 extension le Unit K okucine izihlala ziwela intambo zama getsi ezinye izindlu zasala zisebunyameni.

IKhansili ye Chitungwiza ithi izama ngazo zonke indlela ukusebenzela abantu nomanje ibhekane lenkinga yemali lokusilela kwezimota zokuthwala izibi ngoba kusele eziyisithupha ezisebenzayo.

XS
SM
MD
LG