amalinks wokungena

Breaking News

EleZimbabwe Linanza Ilanga Lamaqhawe Alwela Inkululeko eleHeroes Day


Umongameli Mugabe uthi uhulumende wakhe useqalisile ukuthatha amanyathelo okulandela iziqondiso zohlelo lwebandla lakhe le Zanu PF eze Zim Asset ngenjongo yokuthuthukisa ilizwe.

Ekhuluma phambi kwenkulungwane lenkulungwane zabantu emathuneni eHeroes Acre e Harare ngoMvulo umongameli Mugabe uthe ibandla lakhe liyajabula ukuba ukhetho lwanyakenye luveze obala ukuba ibandla lakhe lilosekelo okwenze labalisolayo besale bengela elomlomo:

U Mugabe osele minyaka engamatshumi athoba munwe munye 90 njalo ejwayele ukukhuluma okwesikhathi eside embuthanweni enje ukhulume okwesikhatshana esingatsholutho wakhuthaza uzulu ukuba eqakathekise ukuthula elizweni njengendlela yokusekela imisebenzi yentuthuko lenhlalakahle kunye lokumanyana kukazulu:

Lokhu kusenzakala ngesikhathi ilizwe libhekana lenkinga kwezomnotho okuhlanganisela ukuvalwa kwamabhizimusi lama fekitali amakhulu kunye lendubo ezigoqela ukusilela kwemali yokusebenzisa elizweni lokusilela kwemisebenzi umongameli Mugabe wazise ukuba uhulumende wakhe selandela iziqondiso zebandla lakhe ze Zim Asset njengendlela yokugcwalisisa izithembiso zebandla lakhe kuzulu ngesikhathi sokhetho lwa nyakenye:

Ngaphansi kwe Zim Asset lelibandla lithembise ukuveza imisebenzi efika kuzigidi ezimbili njengendlela yokulwisana lokusilela kwayo.Uthi okwamanje imisebenzi yokulima ikhanya ithuthuka kakuhle kulokuqonga kwesivuno somumbu ngesimo sokungamatshumi amane alesithupha 46% kulinganiswa lesanyakenye kwaba njalo lentuthuko kusivuno sotshinda legwayi.

Uqhubeke ethi uhulumende uzaqinisa imisebenzi yokutholisa abantu ama permit amatsha kumapulazi abo ephinde ethuthukise imisebenzi yokuvuselelwa kwama fekitali, ezempilakahle lokutholiswa kwamanzi.Umongameli Mugabe kasathembisanga lutho kuzinini zamaqawe empi yenkululelo ebezithe gwaqa kulumbuthano ezithi zibhekana lenkinga ezithile empilweni.

XS
SM
MD
LG