amalinks wokungena

Breaking News

Iziqondiso zeRBZ Zicunula Abaphila Ngokuthengisa Phandle Kwelizwe


Botswana Border

AbeZimbabwe abaphila ngokuthengisa imphahla emazweni angomakhelwane afana leBotswana le South Africa bathi noma nje bejabuliswe yikuvulwa kwemingcele, lokhe kulemigoqo eminengi kubhizimusi labo.

Kunje bathi babanjwa ngamandla ukuthi bebuyisele yonke inzuzo yabo ebhanga elikhulu lelizwe eleReserve Bank of Zimbabwe, njalo ingxenye yemali bayithola isiluhlobo lwama bond notes.

Ukuvulwa kwemngcele bekulethe injabulo kunengi eliphila ngokuthengisa imphahla phandle kwelizwe, ngemva kokuhlala isikhathi eside bengasebenzi kulandela ukuqhamuka kweCOVID-19 ekuqaleni komnyaka.

Kunje abenhlanganiso yeCross Borders Association lokhu bekhulumisana lamakampani ezempilakahle ukuthi bayehliswe intengo yokuhlolwa iCoronvirus, ukuze kuphathise labo abafuna ukuchaphela emazweni angomakhelwane besiyakwenza ibhizimusi.

Kodwa abanye badaniswa ngumthetho kahulumende wokuthi yonke inzuzo abaythola phandle kwelizwe kumele ifakwe esikhwameni sebanga lesizwe eleReserve Bank of Zimbabwe-RBZ.

Umnzana Rowell Moyo ngomunye wabaphila ngokuthenga ethengisa imphahla etshiyeneyo eyeZimbabwe kweleBotswana, othi lelinyathela liyalimaza ibhizimusi labo.

“Uhulumende ufuna sifake imali ebhanga le Reserve Bank. Abafuni ukuthi usebenzise ngitsho lemalini uma usendleleni. Ngemva kwalokhu, bakunika ingxenye ingamadola eZimbabwe, njalo awuyitholi khonapho. Thina sesiba lohlupho lokuthi sicina selahlekelwe ngabathengi ngoba sesilinde ibhanga leRBZ.”

Ibhanga leRBZ, ngoNhlolanja lethule iziqondiso ezivumela abathengisa imphahla phandle kwelizwe, ukuthi bagcine imali eyingxenye yekhulu(50 %) kusiya kokungamatshumi ayitshiyagalo mbili ekhulwini( 80 %), kuyimali yakwamanye amazwe, kuthi eyinye eseleyo iphume isingamadola eZimbabwe.

Abacubungula ngezomnotho bayalisola kakhulu inyathela leli besithi lilakho ukikhipha inengi kubhizimusi.

Kusenjalo, abakubhizimusi yokuhambisa imphahla ekhaya, omalayitsha, bathi ibhizimusi inhle kakhulu ngesikhathi seCOVID-19, ngoba inengi lidonda ukuya ekhaya.

Umnunzana Packers Ndlovu okubhuzimusi le uthi sebekhulelwa linani labantu abafisa ukuphathisa imphahla ekhaya.

“Ngesikhathi seCOVID-19, ibhizimusi ikhona sibili, ngoba abantu abanengi abanelisi ukuzihambela ekhaya. Ibenengi sibili ngenyanga kaMpalakazi ngoba abantu kade bethumela.”

UNdlovu uthi bayaqakathekisa ukuzivikela emkhuhlaneni weCOVID-19 ngesikhathi kulokwesabela ukuthi kungaba khona ukumemetheka komkhuhlane lapho kuthathwa imphahla kulabo abaphathisayo.

“Thina sisebenzisa ama sanitizer kanye lama mask. Uma sisiyathatha imphahla siyageza izandla. Uma imota yethu ithe yachapha umngcele, uma isiphenduka iyahlanzwa kakutsha.”

Inengi labeZimbabwe asebehlala kweleBotswana liyenze imizamo eyokuchapha masinya lisiya ekhaya, ngesikhathi kulokwesabela ukuthi ukuthi kungafakwa imigoqo yokuhamba kuyimizamo yokwenqabela ukumemetheka kweCOVID-19.

Bekulendwendwe zezimota ziphuma edolobheni leGaborone ngobunengi kuyonale iviki, kodwa uhulumende weBotswana kakatsho lutho ngamanyathela azawathatha ngokuhamba kwabantu ngesikhathi sekhefu leKhisimusi.

please wait

No media source currently available

0:00 0:03:06 0:00

Facebook Forum

XS
SM
MD
LG