amalinks wokungena

Breaking News

ZCTU: Izisebenzi Lokhe Zingaphathwa Kuhle Emsebenzini


Workers
Inhlanganiso yezisebenzi i-Zimbabwe Congress of Trade Unions ithi kusadingeka ukuthi idale elikhangela izisebenzi iLabour Court, linikwe amandla athe xaxa ukuze lenelise ukuxazulula indaba zokungezwani emsebenzini, ukungaphathwa ngendlela kwezisebenzi kanye lokungavumelani phakathi kwezisebenzi labaqatshi ngodaba lweholo.

Obambe ihofisi ye ZCTU ku Western Region, uMnumzana Percy Mcijo uthi Siyanda izehlakalo zokungaphathwa kuhle kwezisebenzi lokhe ziqonga ikakhulu emankampanini aphathwa ngabosomabhizimisi abavela emazweni anjenge China le Nigeria.

Uthi ngenxa yalokho kuqakathekle ukuthi izisebenzi zikhankasele ukugcwaliswa kwamalungelo azo kanye lokukhumbuza uhulumende ukuthi ulomlandu wokuncedisa iLabour Court ukuthi iqhube umsebenzi ngendlela.

Wengeze esithi inengi lemithetho ekhona inika abaqhatshi amandla okungakhwezi iholo ezikhathini ezinengi, ibuye yehluleke ukubamba ngamandla laba baqhatshi ukuthi banike izisebenzi imfanelo yabo ingabe sokuvunyelwene ukuthi iholo likhwezwe.

IZCTU ithi inani lezisebenzi elilimalela emsebenzini seliqongile njalo ngoba inhlanganiso ekhangela ngokuphathiswa kwezisebenzi ezilimalela engozini zemsebenzini iNational Social Security Agency ayisaqhubi ngendlela umsebenzi wayo wokunanza ukuthi abaqhatshi bayaqakathekisa impilakahle yezisebenzi na?

UNkosikazi Barbra Tanyanyiwa owe ZCTU, uthi ukuqonga kwengozi zemisebenzini kuveza ukuthi iNSSA ayiwenzi umsebenzi wayo ngemfanelo.

UNkosikazi Nicole Mushayavanhu owe NSSA kuhlangothi lwe Occupational Health and Safety, uthi izisebenzi lazo zilomlandu wokuzakhalaza kulinhlanganiso nxa imipilakahle yazo isengozini ngoba ukusilela kwemali kwenza iNSSA inganelisi ukungena kuwo wonke amankampani. Uthi kumele izisebenzi zingakhangeli kuphela indaba zemali kodwa ziqakathekise impilakahle yazo.

Imbiko evela kuNSSA iveza ukuthi inani labafayo labalimala emisebenzini likhwelile nyakenye kulinganiswa lo 2012 ngesikhathi inani lezisebenzi lisehla ngenxa yokuvalwa kwamankampani. I NSSA ithi kufe abantu abangaphezu kwekhulu – 105 kwalimala abaphezu kwenkulungwane ezinhlanu – 5 210 kuqathaniswa le 5 141 elalimala ngo 2012.
XS
SM
MD
LG