Abenhlanganiso yezisebenzi eyeNational Union of Metalworkers of South Africa, bamanyane labezinye inhlanganiso ezilwela amalunelo oluntu betshengisela esigodlweni sommeli weZimbabwe kulelozwe, ePretoria beveza insolo yabo ngokubusa ngocuku loncindezelo kukahulumende weZanu PF.
Esethula inkulumo yakhe kwabakade betshengisela esigodlweni sommeli weZimbabwe lesi ePretoria, umkhokheli wenhlanganiso yezisebenzi eye National Union of Metalworkers of South Africa (NUMSA) umnumnzana Andrew Chirwa, uchaze uhulumende kamongameli Emerson Mnangagwa njengohulumende wocuku loncindezelo.
“Sithi kuMnangagwa asisoze sithule abantu beZimbabwe besokola ngale ndlela, be oppreswa ngalendlela aba oppreswa ngayo because siyakwazi ukuthi ioppression yabo yi oppression yethu sonke singama Africa. So sithi if abakwazi ukuzikhulumela abantu beZimbabwe sithi sikhona siyiNumsa, sikhona singama organisation ungumsebenzi wethu as part ye international solidarity ukuthi ivoice yabo izwakale.”
Umnumnzana Chirwa usole njalo inkokheli zeSouth Africa, ezenhlanganiso yeSADC leAfrican Union esithi ziyehluleka ukuxazulula inkinga yeZimbabwe ngoba lazo zilesifo zokuncindezela abantu bazo.
Isizalwane seZimbabwe njalo engumkhokheli wenhlanganiso ye African People’s Solidarity Network umnumnzana Mthulisi Hanana uxwayise uhulumende weZimbabwe ukuthi ekele ukubambangamandla uzulu ukuthi acine asezivikela laye ngodlakela olufana lalolu aluthola kuhulumende.
“Kulodubo olukhona eZimbabwe. Udubo lokuthi abantu abasavikelekanga. Uhulumende okumele avikele abantu, uyabathumba, uyababulala, uyabahlukuluza, ubaphatha ngokucu. Uhulumende usebenzisa konke okusemandleni akhe ukuthi abantu bangaphikisani laye. Abakhuluma ngobugwelegwele icorruption bayabotshwa, bavalelwe emajele, bancitshwe ibail ngenxa yokuthi uhulumende usebenzisa umthetho lesisekelo sombuso ukuhlukuluza hatshi ukuvikela abantu beZimbabwe.”
Abatshengisele ngoLwesithathu, batshiye ugwalo lwezikhalazo zabo ehofisini yommeli weZimbabwe kulelo lizwe. Phakathi kwalezo zikhalazo bathi bafuna inhlanganiso yeAfrican Union icwayisise bonke abetheswa umlandu wokwephula amalungelo oluntu eZimbabwe njalo ibeleqiniso lokuthi bayabotshwa bajeziswe. Bafuna njalo umongameli Mnangagwa abotshwe ngokuvumela abezomvikela ukuthumba, ukutshaya, ukubopha lokubulala labo abaphikisana laye.
Isiphathamandla sehofisi yomeli weZimbabwe esivezwe ngokuthi ngumnumnzana Shumba, nguye owemukele ugwalo lwezikhalazo zalabo abebetshengisela.
“Sizalukhangela lolugwalo besesilwedlulisela kuhulumende weZimbabwe.”
Inengi lazizalwane zakwele South Africa sezethule ukuthukuthela kakhulu ngokuthi izithunywa zikamongameli Cyril Ramaphosa lequla lebandla leANC bonke bahambe eZimbabwe baphenduka bengazange bakhulumisane labamabandla aphikisayo lenhlanganiso zikazulu.
Ibandla le ANC lithi iqula lalo lizabuyela liyekhulumisana lenhlangothi zonke kodwa akukabi ngitsho lodletshana lokuthi loluhambo luzakuba nini loba ukuthi kambe uMongameli Emmerson Mnangagwa uzabavumela yini ukuthi bakhulume labamanye amabandla ezombusazwe kanye lenhlanganiso ezilwela amalungelo oluntu.
