amalinks wokungena

Breaking News

Izizalwane zeZimbabwe eSouth Africa Zithi Uzibuse Ongela Mugabe Uyafana Nje Lakudala


Izizalwane ze Zimbabwe eSouth AFrica

Lobanje kulilanga likazibuse lakuqala elithakazelelwa uMnu. Robert Mugabe kungasenguye umongameli welizwe, izizalwane zeZimbabwe ezinengi kweleSouth Africa zithi akulasizatho sokuthakazelela leli langa ngoba akulanto esitshintshile empilweni zab

Kusukela ngo 2000 kusethulwa ibandla le MDC, ukukhitshwa kukaMongameli Mugabe esikhundleni bekuyiyo indabamlonyeni kunengi lezizalwane zeZimbabwe abezisithi umbuso wakhe sewethule olunye uhlobo loncindezelo.

Lamhlanje iZimbabwe yenelisa iminyaka elitshumi lasitshiyagalombili izelwe kusukela ithola uzibuse ngo 1980. Umehluko welanga likazibuse lamhlanje yikuthi ngelakuqala ukuthakazelelwa umnumnzana Robert Mugabe kungasenguye umongameli welizwe.

Lobakunjalo inengi lezizalwane zeZimbabwe kweleSouth Africa zithi awukho umehluko phakathi kukazibuse walamhlanje leminyakeni edluleyo.

Abakhulume leStudio 7 bathi ukuqhubeka behlupheka emazweni bengabuyeli ekhaya kutsho khona ukuthi isimo asikaguquki kuleso ebesikhona phansi kobukhokheli bukamnumnzana Mugabe.

Isizalwane seZimbabwe umnumnzana Greatman Mkhwebu uthi kunzima ukuthi kuthiwe abantu bathakazelela uzibuse ilizwe lingelamali engeyalo, inengi labantu bengasebenzi njalo bengabayanga.

Kutsho uMkhwebu: “UMugabe ukhona uMugabe akekho i independence ngibona engathi kuyafana ukujabulanje yikudlala ngesikhathi ayikho into etshintshile. Umuntu omnyama usasokola. Thina abantu abamnyama sisancindezelana thina sodwa. Inkampani ziyadiliza inkampani zivalile ilizwe kalisela mali. So ngibona engathinje ukujabulela i independence yikudlala ngesikhathi lokhu ngoba uzibuse kawukho. Ezimbabwe akukatholakali ukuthi kukhulunywe ngokukhululeka and lokhu sisaphila ngokwesaba abantu abakhulu abayibo abaphethe.”

Esinye njalo isizalwane seZimbabwe umnumnzana Lizwe Mabuya uthi uhlupho yikuthi sekwaqakathekiswa imihlobo uthole sekulomhlobo oqakathekiswayo kulo munye.

“Nali government ekhona kufana lokuthi kusahamba ibhasi eyi one ebihamba ngoMugabe. Kudlalwa ngabantu lapha asikhohlweni ngokuthi kuthiwa kule independence kwathini thini. Njalo bengikhangelele ukuthi mhlawumbe kungenzeka ukuthi igovernment inikeze iyouth imisebenzi abantu basebenze. Kuvuleke. Ezibhedlela kube right amatitsha lawo kanjalo kungabi lestrike lezi esizibona everyday ngoba impela iyinkinga lento,” kutsho uMabuya.

Unkosazana Mercy Mvundla yena uthi inkululeko eZimbabwe isasekhatshana lokufika.

“Mina ngesingami angiyiboni into engathi iyangijabulisa engangitshela ukuthi sikhululekile ngoba inkululeko emuntwini itsho ukukhululeka ngayo yonke indlela economically, politically langayo yonke indlela umoya ukhululeke,” kutsho uMavundla.

Ngakwelinye icele umnumnzana Mlungisi Tshabalala uthi uzibuse weZimbabwe kukhanya wenzelwa abathile hatshi umuntu wonke.

Kutsho uTshabalala: “I independence ekhona eZimbabwe ngeyalaba abalwela impi yenkululeko or lalaba abakuZanu. Yibo abayikholisayo i Independence. Abantunje or izakhamizi ezikhona indawo zonke akulalutho abalukholisayo. Lokhu sisazihluphekela beze bekhulume ukuthi kwakungcono ngesikhathi sikaSmith ngoba babengasweli lokhu nalokhu.”

Abanyeke bathi inyathelo lakuqala lenkululeko okufanele lithathwe nguhulumende kamnumnzana Emmerson Mnangagwa yikubona ukuthi isisekelo sombuso esavunyelwana nguzulu sisebenza ngokugcweleyo. Abanye bafuna isiqiniseko sokuthi akekho ozabotshelwa ukuthi ucabanga okwehlukeneyo lomongameli welizwe.

Inengike lithi indlela okuzaqhutshwa ngayo ukhetho oluzayo yiyo ezakhombisa sobala ukuthi kambe uzulu weZimbabwe usekhululekile yini kumbe ulokhu ephansi koncindezelo.

Facebook Forum

XS
SM
MD
LG