amalinks wokungena

Breaking News

Izizalwane zeZimbabwe Ezihlala eBotswana Lazo Zizancintisa Kukhetho Lwekhaya


Kwele Botswana
Kwele Botswana

Ezinye izizalwane zeZimbabwe ezizazancintisa kukhetho lwalonyaka zivela phandle kwelizwe, zthi kuqakathekile ukuthi zibe lesabelo ekubusweni kwelizwe, njalo abanye sebeqalile ukuphindela ekhaya ukuyaqinisa imikhankaso yokuthola usekelo ngaphambilini kokhetho lwenyanga ezayo.

Kulehlekanyana labeZimbabwe elihlala kweleBotswana eliphakathi kwalabo abazancintisa kukhetho lwenyanga ezayo.

Abanye abafana loMnu. Bekithemba Jele ozancintisa kukhetho lokuba ngukhansila eNketa, koBulawayo ngaphansi kwebandla le Alliance for the People’s Agenda (APA) uthi kuqakathekile ukuthi abaphandle kwelizwe babe lesabelo ekubusweni kwelizwe.

“Kumele abantu babe lokutsho eZimbabwe ngoba ngibabiza ngithi ngama ‘economic soldiers’, singakhipha umbuso weZANU PF, yibo abazaba ngama ‘economic war veterans, ngakho kumele babelesandla ngoba lokhe bengabantu beZimbabwe,” kutsho uJele.

UJele uthi abantu abangaphandle kwelizwe kumele baphiwe ithuba lokuvota kanye lokutsho okwenzakala eZimbabwe, ngoba bathumela imali enengi kakhulu ebambe umnotho welizwe.

“Bayahlupheka kakhulu bezama ukuphakamisa ilizwe leZimbabwe, bathumela imphahla kanye lemali enengi. Kuzwisa usizi nxa usizwa abantu besithi kabalalungelo lokuvota. Kumele baphiwe ithuba lokuvota. Laye uhulumende weZimbabwe uyakwazi lokho, yikho uMnangagwa kade ehamba ekhuluma labantu abaphandle kwelizwe,” kutsho uJele.

Umthethwandaba ophakemeyo oweHigh Court usanda nquma ukuthi abangaphandle kwelizwe, inengi elinakanelwa ukuthi ngabasekeli bamabandla aphikisayo, alingeke lavota lisemazweni abahlala kiwo.

UJele uthi abantu abangaphandle balolwazi olugcweleyo ngokwenzakala ekhaya, ngoba okunengi kwenzakala phambi kwamehlo abo.

Uthi ngenxa yodubo abebhekana lalo, bangabantu abaqondileyo ukuthi bavotelwe bekhulule abantu ejogweni leZANU PF.

Omunye oseGaborone, umnunzana Nkazimulo Dube uthi uyawusekela umbono wokuthi abangaphandle kwelizwe labo bencintise kukhetho…

“Kuqakathekile ukuthi abangaphandle kwelizwe labo babe lisitsho ekuqhubeni indaba zelizwe ngoba siyazi ukuthi iZimbabwe ilahlekelwe kakhulu zinqondo ezikhaliphileyo eminyakeni esanda kudlula bephuma phandle besiyadinga imsebenzi,” kutsho uDube.

Inengi elingaphandle kwelizwe likhangele okwenzakala eZimbabwe ngamehlo abomvu lile themba lokuthi mhlaumbe kungalunga ekhaya inengi liphindele ngemva kweminyaka labanjwa ngamandla ngomumo ongamanga kahle womnotho, ukuthi baphume elizweni.

Abanye, noma nje umthethwandaba wabalisa ukuthi bavote besemazweni abahlala kibo, bathi bazachapha baye ekhaya ukuyavota mhla ziku30 Ntulikazi 2018.

please wait

No media source currently available

0:00 0:03:11 0:00

XS
SM
MD
LG