amalinks wokungena

'Kumele Sibhalisa Kugwalo Lokuvota eBhilithani Hatshi eZimbabwe'


Kuyahlupha ukuthi abantu babuyele ekhaya bayebhalisa kugwalo lokuvota.

Izizalwane zeZimbabwe ezihlala eBhilithane zithi kusobala ukuthi uhulumende esebenzisa ikhomishini ebona ngezokhetho eyeZimbabwe Electoral Commission (ZEC) uzama ngazo zonke indlela ukuthi avalele phandle izizalwane zeZimbabwe ezihlala kwamanye amazwe ukuthi zingabi lamalungelo kukhetho oluzakwenziwa ngomnyaka ozayo.

Ikhomishini le ithi wonke umuntu ofuna ukuvota ngomnyaka ozayo kumele aye kwele Zimbabwe ukuyabhalisa kugwalo lokuvota njalo aphinde abuyele ngesikhathi sokhetho ukuyavotela abafuna bangene ezikhundleni.

Abantu abanengi bathi lokhu kulendleko yemali emangalisayo ezakwenza ukuthi abantu abanengi bangephatheki kukhetho lolu.

Isisekelo sombuso welizwe esethulelwa uzulu ngomnyaka ka2013 sivumela zonke izizalwane zeZimbabwe ukuthi ziphatheke kukhetho njalo zivotele ezibafunayo kungakhathalekile ukuthi zihlala eZimbabwe kumbe emazweni.

INDLEKO YOKUYABHALISA IKHUPHUKILE

Omunye wabakhonona ngokungavunyelwa ukubhalisa bese Bhilithani nguNkosazana Sindisiwe Dube, okhala ngendleko zokuhamba kanenginengi ukuyabhalisa lokuyavota ekhaya.

“Hayi mina ngizwa ubuhlungu kakhulu, kakhulu kakhulu ukubana sisebenza kanzima sisebenza imali sithumela ekhaya. Imali yethu iyafuneka le ekhaya, sokumele thina sitshiye imsebenzi yethu la eyiyo esinika imali sihambe siye register ukuvota … Sithi sivela ukuya register ukuvota sibuyele futhi ekhaya sihambe siyevota.

“Yindaba khona kule Embassy la? Ingani amapassport wonke sithatha lapha sithumezela khonapha? Ibiometric ke ngeyokwenzani, angithi ziyenziwa izinto on line. This is not fair, this is not fair, thina sifuna ukuvota ekhaya, sifuna ukuvota, singakwenza through the embassy …”

Zinengi izizalwane seZimbabwe ezihlala eNgilandi ezilesifiso sokuya vota ngomnyaka ozayo.

KHULUMANI ZULUKANDABA

UMnu. Arthur Molife, olilunga leZapu, uthi okwenzakalayo akumelanga kuvunyelwe. Ukhuthaza abantu ukuthi bangathuli nje babukele uhulumende esona.

“Bantu bakithi beZimbabwe akesisukumeni sikhonone ngento eyenziwa ngukulumende wakithi lo. Bayakwazi ukuthi abantu abangaphandle bangavalelwa ukuthi bangavoti bona bazahlala bebusa.

“Yikho-ke thina silesigodlo selizwe lapha. Yindaba manje kuthiwa ngiyekhaya ngiye bhalisa igama lami kugwalo lokuvota khona ngingakwenza ngilapha eBhilithani? Amazwe wonke ayakwenza khonokhu ukuthi abantu bamanye amazwe babhalise amagama abo nxa befuna ukuvota esigodlweni zabo ezikwamanye amazwe.”

Izizalwane ezinengi zeZimbabwe kwele Ngilandi zijayele ukuya vota ngesikhathi sokhetho eZimbabwe ngoba babhalisa kudala kugwalo lwabantu abalelungelo lokuvota lona lonyaka osolusenziwa ngendlela entsha yakulez’insuku eye Biometric Voter Registration (BVR) osokusitsho ukuthi sokumele babhalise kutsha.

AKUSOZE KULUNGE EKHAYA

UMaNgulube ngomunye wabesifazana obelesifiso esikhulu sokuyavota. “Ngingumama owafika elizweni leli eleUK ngomnyaka ka 2000. Ngatshiya ngiregestile ekhaya. Ngangivota. Ilungelo lami lalikhona kodwa lapha kuyasimangalisa ukuthi kasivoti ngani lapha esigodlweni selizwe lethu? Kwenziwa yini khonokho, sifuna nje ukuthi kuvotwe silapha ngoba sifuna ukubuyela ekhaya. Sengileminyaka 64 sengile 17 years ngilokhe ngihlezi khonapha izinto zingalungi ekhaya.

“Sifuna ilungelo lokuthi sivote hayikhona ukuthi sihlale lapha singavoti. Siye register ekhaya siphinde sibuyele ngomnyaka ozayo futhi! Lithi imali yakhona siyayithatha ngaphi? Sifuna ukuvota sikhonapha eBhilithani esigodlweni seZimbabwe. Ayakwenza lokhu amanye amazwe. Kuyini okuluma ilizwe leZimbabwe ngodaba lolu?”

Ukubhalisa ukuba lelungelo lokuvota kukhetho oluzayo abeZEC bafuna okunenginengi okuhlanganisela ukubonakalisa ukuthi uyisizalwane seZimbabwe njalo lalapho ohlala khona abathi yiproof of residence.

UNkosazana Nothabo Ncube uthi ulesifiso sokuyavota kodwa akumncedi ngoba into ezifunekayo zonke ukuthi abhalise akalazo.

“Ungaze usuke kudiaspora usuke uye ekhaya bazafika bafune iproof of address, uzayithatha ngaphi iproof of address ungahlali ekhaya. So, isicelo yikuthi abantu babe lethuba yokuthi bavote bekudiaspora, ukwenzela ikusasa lethu, lekusasa labantwabethu, lekusasa leZimbabwe jikelele.”

Ukhetho luka 2018 eZimbabwe lukhangelelwe ngabantu abanengi ukuthi yilo olungaletha inguquko. Isifiso sokuyavota kukhetho lolu sikhona sibili kuzizalwane zeZimbabwe ezihlala kwamanye amazwe okugoqela labase Bhilithane.

Babikwa befika izigidi ezine abeZimbabwe abahlala kwamanye amazwe, okwamanje abayibo abasebenza kanzima bethwele umnotho welizwe ngokuthumela ukudla lemali kodwa abalawo amalungelo okungena kukhetho lweZimbabwe emazweni abahlala kuwo, kumele babuyele ekhaya.

Facebook Forum

XS
SM
MD
LG